गोरखा संग्रहालय अब हप्ताको सातै दिन खुला रहने

मंसिर ३, २०७६ मंगलबार १७:२४:४१ | किरण लोहनी

गोरखा - गोरखा संग्रहालय माघ मसान्तसम्मका लागि मंगलबार पनि खुल्ला रहने भएको छ ।

यसअघि संग्रहालय हप्ताको एक दिन मंगलबार बन्द रहने गरेको थियो । पुरातत्व विभाग अन्तर्गतका सबै संग्रहालय सार्वजनिक बिदाका दिन बाहेक हरेक मंगलबार बन्द हुन्छन् भने शनिबार खुल्ला रहने गरेका छन् ।

गोरखा संग्रहालय भने कर्मचारीको आन्तरिक व्यवस्थापन गरेर सबै दिन खुल्ला राख्ने निर्णय गरिएको संग्रहालय प्रमुख नवराज अधिकारीले बताउनुभयो । मंगलबारका दिन आएका कर्मचारीलाई तलबको अतिरिक्त दैनिक ६ सय रुपैयाँ रकम दिने गरी व्यवस्थापन मिलाइएको उहाँको भनाइ छ ।

विशेष गरी शैक्षिक भ्रमणमा आउने विद्यार्थीहरुलाई लक्षित गरेर सातै दिन संग्रहालय खुल्ला राख्न थालिएको हाे ।

असोज अन्तिम सातादेखि माघसम्म शैक्षिक भ्रमणका लागि गोरखा आउनेको संख्या बढ्ने गर्दछ । संग्रहालय मंगलबार बन्द हुन्छ भन्ने थाहा नपाएकाहरु अवलोकन गर्न नपाइ फर्कनु परेपछि सबै बार खुल्ला राख्नुपर्ने आवाज उठ्ने गरेको थियो । हरेक दिन संग्रहालय खुल्दा पर्यटकको संख्या बढ्ने र राजश्वमा पनि वृद्धि हुने भएकाले खुला गर्न लागिएकाे संग्रहालयले जनाएकाे छ ।

पर्यटकको संख्या बढ्दाे

असोज महिनाको तुलनामा कात्तिकमा संग्रहालय घुम्न आउने पर्यटकको संख्या चार गुणाले बढेको कार्यालयको तथ्याङ्कले जनाएको छ । कात्तिक महिनामा मात्रै १६ हजार ४० जनाले संग्रहालय अवलोकन गरेका छन् ।

असोजमा ४ हजार ६ शय ५२ जनाले संग्रहालयको अवलोकन गरेका थिए । गोरखा राज्य र नेपाल एकीकरणका सन्दर्भ, युद्धमा प्रयोग गरिएका हतियार, पुराना भाँडावर्तन, विभिन्न जातिका पहिचान झल्कने सामग्री, बाजा लगायतका सामग्रीहरु संग्रहालयमा राखिएका छन् । तत्कालीन राजा राजेन्द्रविक्रम शाहले छोरा सुरेन्द्रविक्रम शाहका लागि बनाइदिएको दरबारमै २०६५ सालदेखि संग्रहालय स्थापना गरिएको हो ।

परम्परागत नेपाली वास्तु शैलीबाट बनेको लगभग अन्तिम दरबार भएकाले त्यससम्बन्धी अध्ययन गर्न चाहनेका लागि पनि गोरखा संग्रहालय गन्तव्य बन्ने गरेको संग्रहालय प्रमुख अधिकारीले जानकारी दिनुभयाे ।

यसबाहेक तत्कालीन गोरखा राज्यको स्थापनाको पृष्ठभूमि र ऐतिहासिक पक्षबारे जानकारी दिन चाहनेहरुले पनि गोरखा संग्रहालय भ्रमण गर्दै आएका छन् ।

संग्रहालयमा ऐतिहासिक पक्ष झल्कने १२ वटा कक्ष छन् । गोरखा संग्रहालय रहेको दरबार चार रोपनी क्षेत्रफलमा फैलिएको छ भने संग्रहालय परिसरको क्षेत्रफल भने ६८ रोपनी रहेको छ ।

अन्तिम अपडेट: मंसिर २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्