पर्यटक भित्र्याउन प्रदेश ३ सरकारको तयारी, सबै नाकामा डिजिटल बोर्ड

मंसिर २०, २०७६ शुक्रबार ९:१३:३६ | हरि हुमागाईं

मकवानपुर - प्रदेश ३ सरकारले भ्रमण वर्ष २०२० लाई सफल बनाउन विभिन्न तयारी अगाडि बढाएको छ । प्रदेशको उद्योग, पर्यटन, वन तथा वातावरण मन्त्रालयले भ्रमण वर्षका अवसरमा प्रदेश र जिल्ला स्तरमा विभिन्न समिति बनाएर काम सुरु गर्न लागेको हो ।

संघीय सरकारको पर्यटन मन्त्रालयको कार्यक्रमलाई प्रदेश सरकारले पनि अभियानकै रुपमा अगाडी सारेको छ । भ्रमण वर्षका अवसरमा प्रदेश र जिल्ला स्तरको समिति बनाएर काम गर्न लागिएको उद्योग, पर्यटन, वन तथा वातावरण मन्त्री अरुण प्रसाद नेपालले जानकारी दिनुभयो । प्रदेशमा मन्त्री नेपालकै अध्यक्षतामा प्रदेश स्तरीय समिति बनाइएको छ ।

प्रदेशका १३ वटै जिल्लामा जिल्ला समन्वय समितिका प्रमुख अध्यक्ष रहेको जिल्ला स्तरिय समिति बनाएर पर्यटन वर्ष २०२० को प्रचार प्रसारमा जुटेको उहाँले बताउनुभयो । उहाँका अनुसार सबै समितिले पर्यटक भित्र्याउनका लागि काम गर्नेछन् ।

इन्द्रसरोवर र धुलिखेलमा पर्यटन स्मारक

प्रदेश ३ सरकारले पर्यटन वर्षलाई लक्षित गरेर मकवानपुरको इन्द्रसरोवर र धुलिखेलमा पर्यटन स्मारक बनाउने लक्ष्य पनि राखेको छ । त्यसको काम तत्काल सुरु गर्ने तयारी गरिएको मन्त्री नेपालले बताउनुभयो ।

पर्यटन स्मारक आउँदो जनवरीमा उद्घाटन गर्ने लक्ष्य प्रदेश सरकारले लिएको छ । पर्यटकीय क्षेत्रको पहिचान खुलाउने गरी सरकारले पर्यटन स्मारक बनाउन लागेको हो ।

प्रदेश ३ छिर्ने सबै नाकामा डिजिटल बोर्ड

प्रदेश ३ सरकारले आफ्नो प्रदेश छिर्ने सबै नाकामा डिजिटल बोर्ड राख्ने भएको छ ।

प्रमुख पर्यटकीय स्थलको पहिचान दिनेगरी प्रदेश छिर्ने हरेक नाकामा डिजिटल बोर्ड राख्न लागिएको मन्त्री नेपालले जानकारी दिनुभयो । यसैगरी भ्रमण वर्षको डकुमेन्ट्री निर्माण भइसकेको पनि उहाँले बताउनुभयो ।

भ्रमण वर्षकै अवसरमा काठमाण्डौ उपत्यकामा साइकल ट्रयाक निर्माण गर्ने तयारी पनि प्रदेश सरकारको छ । प्रदेश सरकारकै आयोजनामा यसअघि साइकल यात्रा आयोजना गरिसकिएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हरि हुमागाईं

मकवानपुरका उज्यालो सहकर्मी हरि हुमागाईं नेपाल पत्रकार महासंघको पूर्व जिल्ला अध्यक्षसमेत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्