काठमाण्डाै - शहीद स्मारक ए डिभिजन लिग फुटबलमा नेपाल पुलिस क्लबले दोस्रो जित दर्ता गरेको छ ।

एन्फा मैदान सातदोबाटोमा बुधबार भएको पहिलो खेलमा विभागीय क्लब नेपाल पुलिसले गत संस्करणको उप विजेता भएको संकटा क्लब लाई २–१ गोल अन्तरले पराजित गरेको हो ।

१५ औंँ मिनेटमा पुलिसले उपहार गोलमार्फत अग्रता लिएको थियो । संकटाका अमित तामाङले क्लियर गरेको बलले आफ्नै जाली चुमेपछि पुलिसले उपहार गोलबाट अग्रता लिन सफल भयो । तर १८ औंँ मिनेटमा अमित तामाङले पुलिसको पोस्टमा गोल गर्दै संकटालाई खेलमा फर्काएका थिए ।

३३ औंँ मिनेटमा सुमन लामाले पुलिसका लागि गोल थप्दै खेल २–१ को अवस्थामा पुर्‍याए । पहिलो हाफमा २–१ को अग्रता बनाएको पुलिसले दोस्रो हाफमा मौका पाए पनि गोल भने थप्न सकेन । यसैगरी संकटाले खेलमा फर्कनका लागि गरेको प्रयास पनि असफल हुन पुग्यो ।

याे जितसँगै पुलिस अंक तालिकाकाे पाँचौँ स्थानमा उक्लिएको छ । पराजित भएको संकटा भने दशौँ स्थानमा छ । आजको खेलमा निर्णायक गोल गर्ने सुमन लामा केल्मी म्यान अफ द म्याच घोषित भए ।

*यसअघि संकटा क्लबकाे नाम अन्यथा हुन गएकाेमा क्षमाप्रार्थी छाैँ ।