जेएनयू आक्रमण : छात्र सङ्घकी अध्यक्षसहित १९ जनाविरुद्ध मुद्दा दर्ता

पुष २२, २०७६ मंगलबार १२:५९:२६ | एजेन्सी

काठमाण्डौ – जवाहरलाल नेहरु विश्वविद्यालय (जेएनयू) मा गएको आइतबार साँझ भएको प्रदर्शनले हिंसाको रुप लिएको विषयमा प्रहरीले जेएनयू छात्र सङ्घकी अध्यक्ष आईशी घोषसहित १९ जनाविरुद्ध मुद्दा दर्ता गरेको छ ।

गएको जनवरी ४ तारिखका दिन जेएनयूको सर्भर कक्षमा ताडफोड र सुरक्षा गार्डमाथि आक्रमण गरेको आरोपमा घोषसहित १९ जनाविरुद्ध मुद्दा दर्ता गरिएको भारतीय सञ्चारमाध्यमले जनाएका छन् ।

जेएनयू प्रशासनको गुनासोलाई लिएर छात्र सङ्घकी अध्यक्ष आईशी घोष र अन्य छात्रविरुद्ध दिल्ली प्रहरीले मुद्दा दर्ता गरेको हो । यी सबै छात्रमाथि गएको जनवरी ४ तारिखका दिन सर्भर कक्षमा तोडफोड गरेको त्यहाँ रहेका सुरक्षा गार्डमाथि कुटपिट गरेको आरोप छ ।

जेएनयू प्रशासनले गएको जनवरी ५ तारिखमा गुनासो व्यक्त गरेको थियो र त्यसपछि मुद्दा दर्ता भएको हो ।

जेएनयूमा गएको आइतबार साँझ भएको आक्रमणमा गम्भीर घाइते भएकी छात्र सङ्घकी अध्यक्षलाई १६ वटा टाँका लगाइएको थियो । घटनामा ३६ जना घाइते भएका थिए ।

छात्र सङ्घकी अध्यक्षले आइतबार साँझ भएको आक्रमण सुनियोजित र आरएसएससँग जोडिएका केही प्राध्यापकले हिंसालाई बढावा दिएको बताएकी छिन् ।

छात्र सङ्घका उपाध्यक्ष साकेत मूनले प्रहरीमाथि आरोप लगाउँदै आक्रमण हुनुभन्दा दुई घण्टाअघि नै सूचित गरिएको भए पनि कुनै सहयोग प्राप्त नगरेको बताए । साथै उनले आरएसएससँग जोडिएका केही प्राध्यापकले हिंसा भड्काएको आरोप लगाए ।

आईशी घोषले जेएनयूका कुलपति एम. जगदीश कुमारलाई हिंसाको जिम्मेवार ठहराउँदै पदबाट राजीनामा दिन माग गरेकी छिन् ।

आइतबार तोडफोड र हिंसा भएपछि साबरमती होस्टेलका वार्डनले राजीनामा दिएका थिए ।

गएको आइतबार साँझ नकाब लगाएका आक्रमणकारीको आक्रमणबाट ३० जनाभन्दा बढी व्यक्ति घाइते भएका थिए । घाइते हुनेहरुमा छात्र र शिक्षक पनि थिए । हातमा फलामे रड, हक्की र ढुङ्गा लिएर पुगेका आक्रमणकारीहरुले छात्रहरुलाई निकै निर्मम तरिकाले पिटेका थिए ।

जेएनयू छात्र सङ्घले यो आक्रमण अखिल भारतीय विद्यार्थी परिषद् (एबीवीपी) का व्यक्तिहरुले गरेको आरोप लगाएको छ । गएको शनिबार पनि जेएनयू परिसरमा ढुङ्गा प्रहार भएको खबर सार्वजनिक भएको थियो ।

यसअघि जेएनयूमा आइतबार साँझ भएको हिंसापछि दिल्ली प्रहरीले नचिनेका व्यक्तिविरुद्ध आक्रमण गर्ने र सम्पत्ति नष्ट गर्ने धाराका अनुसार मुद्दा दर्ता गरेको थियो ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्