सातै प्रदेशमा राष्ट्रिय सभा चुनावकाे मतदान हुँदै, परिणाम आजै सार्वजनिक हुने

माघ ९, २०७६ बिहीबार १२:३६:३२ | उज्यालो सहकर्मी

काठमाण्डौ - राष्ट्रिय सभाको रिक्त हुन लागेको १८ सदस्यका लागि अहिले मतदान भइरहेको छ । बिहान १० बजेदेखि सुरु भएको मतदान दिउँसो ४ बजेसम्म हुने छ ।

देशका सातै वटा प्रदेशमा मतदान शान्तिपूर्ण रुपमा भइरहेको निर्वाचन आयोगले जनाएको छ । आयोगका अनुसार हरेक प्रदेशमा तोकिएको मतदान स्थलमा मतदान भइरहेको हो ।

प्रदेश १ मा विराटनगर महानगरपालिकाको वीरेन्द्र सभागृह, प्रदेश २ मा जनकपुर उपमहानगरपालिकाको महेन्द्र नारायणनिधि स्मृति भवन, वाग्मती प्रदेशको ललितपुर महानगरपालिका वडा नम्बर ४ को वडा समितिको भवन, गण्डकी प्रदेशको जिल्ला निर्वाचन कार्यालय कास्की परिसरमा मतदान भइरहेको छ ।

यस्तै प्रदेश ५ को घोराही उपमहानगरपालिकाको कर्मचारी मिलन केन्द्रको भवन, कर्णाली प्रदेशको जिल्ला निर्वाचन कार्यालय सुर्खेत परिसर र सुदूरपश्चिम प्रदेशको सिलगढी नगरपालिकाको पद्म पब्लिक मुक्ति नारायण उच्च माध्यमिक विद्यालयमा मतदान भइरहेको आयोगले जनाएको छ ।

मतदान गर्दै वागमती प्रदेशका मुख्यमन्त्री डाेरमणि पाैडेल

सात प्रदेशमा पाँच सय ५० जना प्रदेश सदस्य र एक हजार पाँच सय ६ जना पालिकाका पदाधिकारीको नाम मतदाता सूचीमा छ । मतदान भएको केही घण्टामा नै मतपरिणाम सार्वजनिक गरिने प्रमुख निर्वाचन आयुक्त दिनेश थपलियाले बताउनु भयो ।

राष्ट्रिय सभाको कुल ५९ सदस्यमध्ये एक तिहाई अर्थात् १९ जना यही फागुन २० गते दुई वर्षे कार्यकाल सकेर बाहिरिन लागेका हुन् । जसमध्ये १८ जना चुनावमार्फत छानिने छन् भने एक जना सरकारको सिफारिसमा राष्ट्रपतिबाट मनोनित हुनेछन् ।

राष्ट्रिय सभामा सात वटै प्रदेशबाट मतभारका आधारमा सदस्य छानिने व्यवस्था छ । जसअनुरुप अहिले प्रदेश १ बाट तीन जना, प्रदेश २ बाट चार जना, प्रदेश ३ बाट दुई जना, गण्डकी प्रदेशबाट दुई जना, प्रदेश ५ बाट तीन जना, कर्णाली प्रदेशबाट दुई जना र सुदूरपश्चिम प्रदेशबाट दुई जना गरी कुल १८ जना चुनावमार्फत छानिने छन् ।

राष्ट्रिय सभा चुनावमा प्रदेशसभा सदस्य, नगरपालिका प्रमुख र उपप्रमुख तथा गाउँपालिकाका अध्यक्ष र उपाध्यक्षले मतदान गर्न पाउने छन् ।

मतदान गर्दै गण्डकी प्रदेशका मुख्यमन्त्री पृथ्वीसुब्बा गुरुङ

१८ सदस्यका लागि भएको चुनावमा ६ दलका ४५ जना उम्मेदवार प्रतिस्पर्धामा छन् ।

काे काे बाहिरिँदै ?

दुई वर्षे कार्यकाल सकिनेमा अर्थमन्त्री डा. युवराज खतिवडासहित नेकपाका ९, काङ्ग्रेसका सात, राजपाका दुई र समाजवादी पार्टीका एक जना सदस्य छन् ।

बिदा हुनेहरुमा नेकपातर्फका अर्थमन्त्री खतिवडासहित, बलरामप्रसाद बास्कोटा, कालीबहादुर मल्ल, हरिचरण शिवाकोटी, युटोल तामाङ, कमलाकुमारी ओली, खेमराज नेपाली, मिना बुढा र राजकुमार कुँवर छन् ।

त्यसैगरी नेपाली काङ्ग्रेसका मुख्य सचेतकसमेत रहनु भएका सुरेन्द्रराज पाण्डे, सरिता प्रसाईँ, बद्रीप्रसाद पाण्डे, मुक्ताकुमारी यादव, धनकुमारी खतिवडा, विन्दादेवी आले (राना) र दुर्गाप्रसाद उपाध्यायको पनि कार्यकाल सकिँदैछ ।

त्यस्तै राजपाका वृषेशचन्द्र लाल र रमेशप्रसाद यावद तथा समाजवादी पार्टीका रामप्रीत पासवान राष्ट्रिय सभाबाट बिदा हुँदै हुनुहुन्छ ।

अन्तिम अपडेट: पुस २२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्