‘३० जना बोक्ने बस चल्न नदिने, ८० जना बोक्ने प्लेनलाई किन छुट ?’

 चैत ८, २०७६ शनिबार १७:४०:३२ | उज्यालो सहकर्मी
unn.prixa.net

काठमाण्डाै - सार्वजनिक बस चल्न प्रतिबन्ध लगाउने तर हवाइजहाज चल्न दिने सरकारी निर्णयको यातायात व्यवसायीहरुले विरोध गरेका छन् ।

शुक्रबार भौतिक पूर्वाधार तथा यातायात मन्त्रालयमा भएको छलफलमा मन्त्री वसन्तकुमार नेम्वाङसँग नेपाल यातायात व्यवसायी राष्ट्रिय महासंघका महासचिव सरोज सिटौलाले बसलाई रोक लगाएर जहाजलाई चल्न दिएकोप्रति असहमति जनाउनुभएको छ ।

‘कोरोना सर्छ भनेर ३० जना यात्रु बोक्ने बसलाई चल्न प्रतिबन्ध लगाइएको छ । तर ८०  जना बोक्ने जहाज निर्बाध रुपमा चल्न पाउने निर्णय सुहाएन । बसमा कोरोना लाग्ने र प्लेनमा नलाग्ने भन्ने हुन्छ ?’ महासचिव सिटौलाले प्रश्न गर्नुभयो । 

उहाँले सार्वजनिक यातायातले सरकारले तोकेकै भाडामा यात्रुलाई सेवा दिइरहेकाे तर जहाजले चर्को मूल्यमा यात्रु बोकेको भन्दै जहाजको मनोमानी रोक्न माग गर्नुभयो ।

काठमाण्डौ छाडेर जाने यात्रुको भिड बढ्दै गएकाले सार्वजनिक गाडी चल्न पाउने समय अझै एक/दुई दिन बढाउन पनि उहाँले माग गर्नुभयाे । 

जवाफमा मन्त्री नेम्वाङले प्रधाममन्त्रीबाटै निर्णय भएको विषयमा आफूले अर्को निर्णय गर्न नसक्ने र कोरोना सङ्क्रमण रोकथाम तथा नियन्त्रण उच्चस्तरीय समन्वय समितिको बैठकमा याे विषय राख्ने आश्वासन दिनुभएकाे महासचिव सिटौलाले उज्यालो अनलाइनलाई जानकारी दिनुभयो । 

अन्तिम अपडेट: चैत ७, २०८०

तपाईको प्रतिक्रिया