भारतीय प्रधानमन्त्री नरेन्द्र मोदीको सभामा समयमा एउटा टेन्ट लड्यो । जसका कारण मोदीको भाषण सुन्न आएका धेरै जना घाइते भए ।

घटनामा घाइते भएकी रीता मुदीलाई प्रधानमन्त्री मोदीले अस्पतालमै पुगेर अटोग्राफ  दिएका थिए । रीता एकाएक आफ्नो गाउँमा सेलिब्रिटी बनिन् । बाँकुराको क्रिस्टियन कलेजमा स्नातक दोस्रो वर्षमा अध्ययनरत रीता कोलकाताबाट २३० किलोमिटर टाढा रानीबंध गाउँकी बासिन्दा हुन् । 

प्रधानमन्त्री मोदीको अटोग्राफ पाएका कारण रीताको चर्चा गाउँमा मात्रै होइन, अन्य राज्यमा पनि फैलियो । यहाँसम्म कि उनलाई विवाहको प्रस्तावसमेत आयो । उनी भन्छिन्, ‘ त्यो दिन जब मेरो सामू पीएम मोदीलाई देख्दा म अत्यन्तै खुशी भएकी थिएँ ।’ गएको जुलाई १६ मा रीता आफ्नी आमा र बहिनीसँग प्रधानमन्त्री मोदीको भाषण सुन्न मिदनापुर आएकी थिइन् । 

रीता र उनको परिवार टेन्टमूनि बसेको थियो । उनीहरुमाथि टेन्ट खसेपछि रीता घाइते भइन् । उनलाई उपचारका लागि अस्पताल लगियो । सभा सकिएपछि प्रधानमन्त्री मोदी घाइतेहरुलाई भेट्न अस्पताल पुगे । रीता भन्छिन्, ‘मैले प्रधानमन्त्रीसँग अटोग्राफका लागि अनुरोध गरेकी थिएँ । उहाँ अलि हिच्किचाउनु भएको थियो । मैले पुनः आग्रह गरेँ । त्यसपछि एउटा कागजको टुक्रामा प्रधानमन्त्री मोदीले लेख्नुभयो – रीता मुदी तिमी खुशी रहनु, नरेन्द्र मोदी ।’

रीता भन्छिन्, ‘यो घटना घटेको अर्को दिन हाम्रो घरमा त मान्छेकै भिड लाग्यो । सबै जना प्रधानमन्त्रीको अटोग्राफ हेर्न चाहन्थे ।’ रीताकी आमा सन्ध्या भन्छिन्, ‘मान्छेहरु हाम्रो घरमा अटोग्राफ हेर्न मात्रै होइन, विवाहकै प्रस्तावसमेत लिएर आए। एकजना त टाटानगर, झारखण्डका रहेछन् । केटाको व्यापार व्यवसाय रहेछ । उनले छोरी बाहेक केही मागेका छैनन । दोस्रो प्रस्ताव बांकुराबाटै आएको छ । केटाको खेतीकिसानी गर्ने प्रशस्त जमिन रहेको छ ।