बलिउड अभिनेता ऋषि कपूर आफ्ना विवादित ट्वीटका कारण सधैँ चर्चामा आउने गर्छन् । उनी विवादका पर्याय नै हुन् भन्दा पनि हुन्छ । फेरि एकपल्ट उनी एउटा ट्वीटका कारण विवादमा परेका छन् । 

पाकिस्तानमा भएको संसदीय चुनावमा पूर्व क्रिकेटर इमरान खानको पार्टी पीटीआई सबैभन्दा ठूलो पार्टीका रुपमा उदाएको छ । यसकै बारेमा कपूरले गरेको ट्वीटका कारण उनी विवादमा परेका छन् । उनले इमरान खान पाकिस्तानी प्रधानमन्त्री बनेपछि भारत–पाकिस्तानबीचको सम्बन्धमा सुधार आउने आशा व्यक्त गरेका छन् । 

ऋषि कपूरले दुई देशबीचको सम्बन्ध सुध्रिने कुरा मात्रै होइन, आफ्नो आउँदै गरेको चलचित्र ‘मुल्क’ को प्रमोशन पनि गर्न भ्याए । त्यसपछि के चाहियो ? उनी सामाजिक सञ्जालमा ट्रोल नै भए । 

अभिनेता ऋषि कपूरको ट्वीट यस्तो थियो, ‘तपाईँले निकै राम्रो काम गर्नुभयो इमरान खान । भारत र पाकिस्तानका बारेमा तपाईँले पछिल्ला दुई दिनमा जे कुरा भन्नुभयो । म पनि त्यही कुरा निकै लामो समयदेखि कुरिरहेको थिएँ । म आशा गर्दछु कि तपाईँ आफ्नो ‘मुल्क’ र मेरो ‘मुल्क’ बीचको सम्बन्ध सुधार्न सहयोग गर्नुहुनेछ ।’

Well spoken Imran Khan. I have been saying whatever you said on all channels past two days regarding India-Pakistan! I hope you succeed in making your “Mulk” have good relations with my “Mulk” pic.twitter.com/YCe741vW22

— Rishi Kapoor (@chintskap) July 26, 2018

ऋषि कपूरको ट्वीट भारतीय प्रशंसकले मन पराएनन् । खासगरी आफ्नो फिल्मको प्रचारमा इमरान खान र पाकिस्तानी चुनावको सहारा लिएकोमा धेरैले आपत्ति जनाए । एक जनाले ट्वीट गर्दै आफ्नो प्रतिक्रिया दिएका छन्, ‘यहाँ पनि आफ्नै चलचित्रको प्रमोशन । अंकलजी गलत कुरा ।’ अर्का व्यक्ति ऋषि कपूरलाई उडाउँदै लेख्छन्, ‘‘मुल्क’ उनीहरुको हो, हाम्रो त ‘देश’ हो ।’

बिहीबार चुनावी नतिजा आएपछि इमरान खानले पत्रकार सम्मेलन गर्दै भारतीय मिडियाले आफूलाई बलिउडको भिलेनका रुपमा प्रस्तुत गरेको आरोप लगाएका थिए । उनले भारतसँगको सम्बन्ध सुधारमा आफू लाग्ने पनि बताएका थिए ।