स्वीडेनका स्टार ज्लाटन इब्राहिमोभिचले एमएलएसमा पहिलो ह्याट्रिक गर्दा एलए ग्यालेक्सीले ओर्लान्डो सिटीमाथि ४–३ को जित निकालेको छ ।

क्यालिफोर्नियामा सोमबार भएको खेलमा ज्लाटनले मेजर लिग सकर लिगमा पहिलो ह्याट्रिक गरेपछि दुई पटक पछि परेको अवस्थामा एलए ग्यालेक्सी विजयी भएको थियो । इब्राहिमोभिचले तीनवटै गोल दोस्रो हाफमा गरेका थिए ।

१८औं मिनेटमा क्रिष्टियन हिग्वेटले गोल गर्दै ओर्लान्डो सिटीलाई अग्रता दिलाएका थिए । तर ३९औं मिनेटमा जियोभानी डोस सान्टोसले एलए ग्यालेक्सीका लागि गोल गर्दै खेल बराबरीमा पुर्‍याए । ४४औं मिनेटमा मिकेल सियानीले आत्मघाती गोल गरेपछि ओर्लान्डो सिटीले पुनः अग्रता लियो ।

पहिलो हाफमा २–१ ले पछि परेको अवस्थामा ज्लाटनले ४७औं मिनेटमा पहिलो गोल गरेपछि खेल २–२ गोलको बराबरीमा पु्‍र्‍याए । ५४औं मिनेटमा डम डायरले गोल गरेपछि फेरि ओर्लान्डो सिटीले अग्रता लिएको थियो ।

६७औं मिनेटमा ज्लाटन इब्राहिमोभिचले व्यक्तिगत दोस्रो गोल गर्दै खेल ३–३ गोलको बराबरीमा पुर्‍याए । ७१औं मिनेटमा ज्लाटनले ह्याट्रिक गर्दै एलए ग्यालेक्सीलाई अग्रता दिलाए । बाँकी समयमा गोल हुन नसक्दा एलए ग्यालेक्सी विजयी भयो ।

एमएलएसमा ३५ अंकसहित एलए ग्यालेक्सी तेस्रो स्थानमा छ ।