नाका बन्द लगत्तै काभ्रेमा 'लकडाउन' खुकुलो

वैशाख २७, २०७७ शनिबार १७:२२:३३ | रासस

काभ्रेपलाञ्चोक – काभ्रेपलाञ्चोक प्रवेश गर्ने सबै नाका बन्द गरिएपछि लकडाउन खुकुलो बनाइएको छ ।

काभ्रेमा कोभिड-१९ रोकथाम तथा नियन्त्रण, व्यवस्थापन कमाण्ड पोस्टले कोरोना भाइरस सङ्क्रमणको जोखिम बढ्दै गएपछि जिल्लासँग सिमाना जोडिएका नाकाबाट नागरिकलाई जिल्ला आवत जावतमा पूर्णरूपमा रोक लगाएको थियो ।

जिल्ला प्रवेश नाकामा कडाइ गरेको एकै दिनपछि जिल्ला सङ्कट व्यवस्थापन केन्द्रले शुक्रबार साँझ जिल्लामा लकडाउन खुकुलो बनाउने निर्णय गरेको थियो । केन्द्रले सुरक्षाको मापदण्ड र सामाजिक दुरी कायम गरी विभिन्न उद्योग तथा विकास निर्माण सम्बन्धित आयोजना सञ्चालन गर्न दिइने निर्णय गरेको थियो ।

तर जिल्लाको कुनै क्षेत्रमा कोराना भाइरसको सङ्क्रमणको जोखिम देखिएमा त्यस क्षेत्र वा जिल्लाभरि नै निश्चित अवधिसम्मका लागि स्थानीय प्रशासनले सबै रोक लगाइने शर्त राखेको छ ।

केन्द्रका अनुसार कृषि तथा पशुपंक्षीजन्य दूध, तरकारी, माछा, कुखुरा, अण्डा र दाना उत्पादन गर्न पाइने छ भने मल तथा बीउबिजनको ढुवानी र बिक्री गर्न पाइनेछ । साथै शीतभण्डारसमेत सञ्चालन गर्न पाइने केन्द्रले निर्णय गरेको छ ।

यहाँ सञ्चालित सडक आयोजना, नदी नियन्त्रणका कार्य तथा शहरी पूर्वाधारका योजना एक ठाउँमा अधिकतम १० भन्दा कम मजदुरले काम गर्ने गरी लकडाउन केही खुकुलो बनाइएको प्रमुख जिल्ला अधिकारी श्रवणकुमार तिमल्सिनाले जानकारी दिनुभयो । उहाँका अनुसार सरकारको वैशाख २५ गतेको पत्रअनुसार सबै क्षेत्रमा स्वास्थ्य सुरक्षा मापदण्ड अपनाइ सामाजिक सेवातर्फका बैंक, विद्युत्, खानेपानी, सञ्चार, फोहरमैला व्यवस्थापन तथा दमकल सञ्चालन हुनेछन् ।

‘पानी, ग्यास, पेट्रोलियम पदार्थ बोकेका भन्सार पास भएका सबै प्रकारका सवारी साधन सञ्चालन हुन पाउनेछन्’, उहाँले भन्नुभयो । यस्तै उद्योगतर्फका चामल, चिउरा, पिठो, पाउरोटी, तेल, दाललगायत घरेलु साना उद्योग सञ्चालन हुनेछन् ।

तर विश्वविद्यालय, क्याम्पस, विद्यालय, सिनेमाहल, होटल, बार र रेस्टुरेन्ट तथा पार्टी प्यालेस, फन पार्क आदि भने सञ्चालन हुन पाउने छैनन् ।

पोस्टले सिन्धुपाल्चोकसँग जोडिएको सबै गाउँपालिका तथा भक्तपुरसँग जोडिएको बनेपा नगरपालिका साँगामा आजदेखि अत्यावश्यक सवारीबाहेकलई पूर्णरुपमा बन्द गर्ने निर्णय गरेको थियो ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्