स्याङ्जाकोे कालिका सामुदायिक अस्पताल कोरोना अस्पतालमा परिणत

जेठ २१, २०७७ बुधबार १५:४७:४८ | राधाकृष्ण डुम्रे

स्याङ्जा – स्याङ्जाको मध्य भागमा रहेको कालिका सामुदायिक अस्पताललाई आइसोलेशनसहितको कोरोना अस्पतालमा परिणत गरिएको छ ।

जिल्लामा कोरोना सङ्क्रमितको सङ्ख्या बढ्दै जान थालेपछि गण्डकी प्रदेशको सहयोगमा भीरकोटमा रहेको कालिका अस्पताललाई कोरोना अस्पतालमा परिणत गरिएको हो ।

सङ्क्रमितको सङ्ख्या बढ्दै जान थालेको र जिल्ला अस्पतालमा ठाउँ नभएकाले विकल्पको रुपमा कालिका सामुदायिक अस्पताललाई कोरोना अस्पतालमा परिणत गरिएको गण्डकी प्रदेशका स्वास्थ्य निर्देशक डाक्टर विनोद बिन्दु शर्माले जानकारी दिनुभयो ।

डा. शर्माले कोरोना सङ्क्रमितलाई जिल्लाबाहिर लैजाँदा नकारात्मक सन्देश जाने बताउँदै जिल्लाकै कोरोना अस्पतालमा राख्दा बिरामीका आफन्तहरुले पनि भेट्न सजिलो हुने बताउनुभयो ।

स्याङ्जामा रहेका ११ पालिका, जिल्ला प्रशासन कार्यालय र जिल्ला अस्पतालको पहलमा गण्डकी प्रदेशले कोरोना अस्पताल सञ्चालनमा ल्याएको वालिङ नगरपालिकाका प्रमुख दिलिप प्रताप खाँणले जानकारी दिनुभयो ।

कालिका सामुदायिक अस्पताललाई पहिलो चरणमा ६० शय्याको कोरोना अस्पतालको रुपमा सञ्चालनमा ल्याइएको छ । आवश्यक परेको खण्डमा शय्या थप्न सकिने जानकारी दिँदै कोरोना सङ्क्रमितलाई आवश्यक पर्ने स्वास्थ्य सामग्री सबै उपलब्ध हुने गण्डकी प्रदेश स्वास्थ्य निर्देशनालयले जनाएको छ ।

जिल्लाभित्र भारतबाट आउनेको सङ्ख्या दिनानुदिन बढ्दै गएको छ । गण्डकी प्रदेशको नाका राम्दीबाट मात्रै दैनिकजसो ४०/५० जना आउने गरेका छन् । भारतबाट आउनेहरुलाई किटको अभावमा आरडीटी परीक्षण गरिएको छैन । उनीहरु सबैको पालैपालो पीसीआर परीक्षण गर्न सुरु गरिएको छ ।

महामारीको रुपमा फैलिरहेको सङ्क्रमणलाई सबै मिलेर न्यूनीकरण गर्नुपर्ने प्रमुख जिल्ला अधिकारी गङ्गाबहादुर क्षेत्रीले बताउनुभयो । प्रजिअ क्षेत्रीले कोरोना न्यूनीकरण गर्न जिल्लामा रहेका सबै पालिकाहरुले सराहनीय कार्य गरेकोमा प्रशंसा गर्नुभयो । उहाँले कोरोना सङ्क्रमण रोक्न सबै सचेत हुनुपर्ने बताउँदै सङ्क्रमणबाट बच्न दुरी कायम गर्नुपर्नेमा जोड दिनुभयो ।

स्याङ्जामा कोरोना सङ्क्रमितको सङ्ख्या १२ जना पुगे पनि कोरोना अस्पताल हेलुमा चापाकोटका चार जना र बिरुवाका एक जना गरी पाँच जनालाई राखिएको छ, एक जनालाई पोखरा लगिएको छ भने अरु सङ्क्रमितलाई जिल्ला अस्पतालको आइसोलेसनमा राखिएको छ ।

अन्तिम अपडेट: पुस १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधाकृष्ण डुम्रे

स्याङजाका पत्रकार राधाकृष्ण डुम्रे उज्यालोका जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्