सवारी पास बन्द भएपछि यात्रु ओसार्न सरकारी गाडी र एम्बुलेन्सको प्रयोग

साउन ३२, २०७७ आइतबार २०:२३:१८ | सीताराम ओझा

कैलाली – सुदूरपश्चिम प्रदेशमा सरकारी गाडी र एम्बुलेन्स लगायतका सवारी साधनको दुरुपयोग गर्ने क्रम बढेको छ ।

गृह मन्त्रालयले जिल्ला प्रशासन कार्यालयबाट वितरण हुँदै आएका सबै प्रकारका सवारी पासमा रोक लगाएपछि सुदूरपश्चिममा सरकारी गाडी र एम्बुलेन्सहरुको दुरुपयोग बढेको हो ।

प्रदेशको अस्थायी राजधानी धनगढी सहितका जिल्लामा यात्रुहरुलाई ओसार्न एम्बुलेन्स र सरकारी गाडीहरुको प्रयोग हुन थालेको छ । सवारी पास वितरणमा रोक लागेपछि तीन दिनको अवधिमा यात्रुहरु ओसार्ने तीन वटा एम्बुलेन्स प्रहरीले नियन्त्रणमा लिइसकेको छ ।

साउन ३० गते राति प्रहरीले गेटाबाट ११ यात्रुसहित जिल्ला अस्पताल डोटीको एम्बुलेन्स समेत नियन्त्रणमा लिएको थियो । सुदूरपश्चिम प्रदेश ट्राफिक प्रहरी कार्यालय अत्तरियाका प्रमुख ट्राफिक प्रहरी उपरीक्षक लोकेन्द्रबहादुर श्रेष्ठले अहिलेसम्म यात्रु ओसार्न प्रयोग गरिएका तीनवटा एम्बुलेन्स नियन्त्रणमा लिएर सम्झाइ बुझाइ छाडिएको बताउनुभयो ।

बिरामीको बहाना बनाएर एम्बुलेन्स चालकहरुले एक ठाउँबाट अर्को ठाउँसम्म यात्रु ओसार्न थालेपछि कोरोनाको जोखिम बढेको छ । बिरामीलाई अस्पतालसम्म पुर्याएपछि एम्बुलेन्सहरुले यात्रु खोज्दै उनीहरुबाट मोटो रकम असुलेर गन्तव्यसम्म पुर्याउने गरेको आरोप लागेको छ । तर एम्बुलेन्स चालकहरु भने यो कुरा स्वीकार गर्न तयार छैनन् ।

सुदूरपश्चिम एम्बुलेन्स चालक संघका अध्यक्ष लक्ष्मण सिंहले यात्रु ओसारेको भन्ने कुरामा सत्यता नभएको दाबी गर्नुभयो । उहाँले बिरामी मात्र नभएर एम्बुलेन्समा उनीहरुका आफन्त समेत आउने जाने भएका कारण यात्रु हुन की भन्ने पर्न गएको जनाउनुभयो ।

स्थानीय तह, प्रदेश सरकार, संघीय सरकार लगायतका निकायका सरकारी गाडीहरु समेत सवारी ओसार्न प्रयोग भइरहेको आरोप लागेको छ । तर प्रहरीले भने सरकारी गाडी दुरुपयोग भएको नभेटिए पनि जाँचमा कडाइ गरेकाले त्यसो भेटिए कारवाहीको दायरामा ल्याइने जनाएको छ ।

प्रदेश ट्राफिक प्रहरी कार्यालय अत्तरियाका प्रमुख प्रहरी उपरीक्षक लोकेन्द्र श्रेष्ठले गृह मन्त्रालयको निर्देशन पालना गर्न अर्को आदेश नभएसम्मका लागि सवारी साधनको जाँचमा कडाइ गरिएको बताउनुभयो । एम्बुलेन्स मात्र नभएर सरकारी गाडीमाथि समेत निगरानी बढाइएकाले दुरुपयोग गरेको भेटिए कारवाहीको दायरामा ल्याउने उहाँको भनाइ छ ।

अन्तिम अपडेट: कात्तिक २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सीताराम ओझा

सीताराम ओझा कैलालीका उज्यालाे सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्