चरन क्षेत्रको अभाव, पुस्तैनीदेखिकाे चौरी पालन व्यवसाय सङ्कटमा

असोज १, २०७७ बिहीबार १८:८:२० | दीपक भट्ट

रामेछाप – रामेछापको दोरम्बा गाउँपालिकाको शैलुङ्ग क्षेत्रमा चौरी पालन गर्दै आएका किसानहरु चरन क्षेत्र नहुँदा पुस्तैनी पेसा नै सङ्कटमा पर्ने अवस्थामा छन् । दोलखा र रामेछापको सिमानामा पर्ने शैलुङ्ग क्षेत्रमा पुर्खादेखि चौरी पालन गर्दै आएका किसानहरु अहिले समस्यामा परेका हुन् ।

विगतमा चौरी पालन गर्ने किसानहरुको सङ्ख्या कम थियो । तर केही वर्षयता चौरीबाट उत्पादित दूध, घ्यू, छुर्पी, चिज बिक्री गरेर किसानहरुले मनग्य आम्दानी गर्न थालेपछि लेकाली क्षेत्रका अन्य किसानहरुले पनि चौरी पाल्न सुरु गरेपछि चरन क्षेत्रको अभाव भएको दोरम्बा गाउँपालिका १ को डडुवा गुफाका लालबहादुर योञ्जनले बताउनुभयो ।

उहाँले भन्नुभयो, ‘शैलुङ्ग क्षेत्र उच्च लेकाली भूभागमा पर्ने भएकाले यस क्षेत्रमा आलु बाहेक अरु बाली नहुने हुँदा किसानहरु अन्य बाली लगाउन छाडेर चौरी पालनतर्फ आर्कषित भएका हुन् ।’ चौरी पालन गर्दै आएका किसानहरुका लागि पालिकाले चरन क्षेत्रको व्यवस्थापन लगायतमा सहयोग नगर्दा साह्रै समस्यामा परेको योञ्जनको गुनासो छ ।

अहिले शैलुङ्गका १७ घरधुरीले तीन सयको सङ्ख्यामा चौरी पालन गर्दै आएका छन् । वर्षाको समयमा घाँस उम्रने र खुवाउन सहज भए पनि प्रयाप्त घाँस नहुँदा यो समयमा पनि किसानहरुले समस्या झेल्दै आएका छन् । हिउँदमा त झन् समस्या हुने गरेको किसानको गुनासो छ ।

चौरी पाल्दै आएका किसानहरुले पहिला स्थानीय गोदावरी र कालिञ्चोक सामुदायिक वनलाई चरन क्षेत्रको रुपमा प्रयोग गर्दै आएको डडुवा राजभिरका किसान फुर्वा शेर्पाले बताउनुभयो ।

उहाँले भन्नुभयो, ‘अहिले सामुदायिक वनहरुले चरन क्षेत्र रोकेपछि किसानहरुलाई समस्या भएको हो । अहिले किसानहरुले आफ्नै खरबारीमा चरन क्षेत्र बनाएर त्यहीँ चौरी चराउने गरेका छन् ।’

चौरी पाल्ने किसान बढेसँगै चौरीको गोठ निमार्ण र चरन क्षेत्रको समस्या भएको दोरम्बा गाउँपलिकाका उपाध्यक्ष कृशला घिसिङले जानकारी दिनुभयो । ‘गएको आर्थिक वर्षमा प्रदेश सरकारबाट प्राप्त केही बजेटबाट किसानहरुलाई केही सहयोग गरेका छौँ । गाउँपालिकाले यस आर्थिक वर्षमा चौरी चरन क्षेत्र व्यवस्थापन र गोठ सुधारको लागि बजेट विनियोजन गरेको छ । विनियोजित बजेट चाँडै कार्यान्वयनमा ल्याएर किसानहरुको समस्या समाधान गरिनेछ ।’

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

दीपक भट्ट

दीपक भट्ट उज्यालोका रामेछाप सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्