दुई देशबीच भएका महत्वपूर्ण सम्झौता कार्यान्वयनको लागि नेपाल आएको हुँ : फेङहे

 मंसिर १४, २०७७ आइतबार १३:५४:४५ | उज्यालो सहकर्मी
unn.prixa.net

काठमाण्डाै – चीनका रक्षामन्त्री वेइ फेङहे नेपाल आउनुभएको छ । रक्षामन्त्री फेङहे एक्काइस सदस्यीय प्रतिनिधिमण्डलको नेतृत्व गर्दै विशेष विमानबाट बिहान १० बजे काठमाण्डौ आउनुभएको हो ।

उहाँलाई गृहमन्त्री रामबहादुर थापा बादलले त्रिभुवन विमानस्थलमै पुगेर स्वागत गर्नुभएको छ । फेङहेले चीन र नेपालका राष्ट्रप्रमुखबीच विगतमा भएका महत्वपूर्ण सम्झौता कार्यान्वयनको सिलसिलामा आफू नेपाल आएको बताउनुभएको छ ।

सैन्य सहयोग वृद्धि गर्दै दुई देशबीचको सम्बन्धलाई थप सुदृढ बनाउने उद्येश्यका साथ आफ्नो भ्रमण भएको बताउँदै फेङहेले दुई देशबीचको सम्बन्ध थप उचाईमा पुग्ने र भ्रमण नतिजामुखी हुने विश्वास व्यक्त गर्नुभयो । उहाँ अहिले प्रधानसेनापति पूर्णचन्द्र थापासँग द्विपक्षीय वार्ताको लागि जंगी अड्डा पुग्नुभएको छ ।

उहाँले राष्ट्रपति विद्यादेवी भण्डारी, रक्षामन्त्रालयको समेत कार्यभार सम्हाल्नुभएका प्रधानमन्त्री केपी शर्मा ओलीसँग बेग्लाबेग्लै शिष्टाचार भेट गर्नुहुनेछ । परराष्ट्र मन्त्रालयले नेता वेइको यो भ्रमणलाई ‘कार्यगत’ भ्रमण भनेको छ । साथै भ्रमणले नेपाल र चीनबीचको सम्बन्ध अझ सुदृढ हुने परराष्ट्र मन्त्रालयले जनाएको छ ।

अन्तिम अपडेट: मंसिर १४, २०७७

तपाईको प्रतिक्रिया