अबको 'मिसन' विघटित प्रतिनिधि सभाको पुनर्स्थापना : याेगेश भट्टराई

पुष १२, २०७७ आइतबार २०:३८:४६ | गोविन्द शर्मा

बाँके – नेपाल कम्युनिस्ट पार्टी (नेकपा) काे प्रचण्ड–नेपाल समूहका नेता योगेश भट्टराईले प्रधानमन्त्री केपी शर्मा ओलीले प्रतिनिधि सभाको विघटन गर्नु सबैभन्दा ठूलो अपराध भएको आरोप लगाउनुभएको छ ।

अहिलेको अवस्थामा प्रतिनिधि सभा विघटन गर्ने अधिकार प्रधानमन्त्रीमा नभएको उहाँले बताउनुभयो । पार्टीको बाँके जिल्लास्तरीय भेला तथा प्रशिक्षणलाई आइतबार नेपालगञ्जमा सम्बोधन गर्दै नेता भट्टराईले भन्नुभयो, ‘कम्युनिस्टको बहुमत भएको संसद् विघटन गरी मुलुकलाई कहाँ पुर्याउन खोजिँदैछ । प्रधानमन्त्री ओलीलाई साविकको नेकपा एमाले र जनताको बहुदलीय जनवादभन्दा प्रधानमन्त्रीको कुर्सी प्यारो लाग्यो ।’

पार्टी एकतापछि साविक एमाले र माओवादीको रुपमा कित्ताकाट नहुने भन्दै उहाँले अबको आवश्यकता एकताबद्ध नेकपा नै भएको बताउनुभयो । विवादअघिको केन्द्रीय कमिटीको बहुमत पक्ष नै आधिकारिक हुने भन्दै उहाँले नेकपा र सूर्य चुनाव चिह्न आफूहरूको नै हुने दाबी गर्नुभयो । चुनाव गर्नका लागि मिति घोषणा नभएको दाबी गर्दै उहाँले अबको मिसन विघटित प्रतिनिधि सभाको पुनर्स्थापना नै भएको टिप्पणी गर्नुभयो ।

दुई अध्यक्षबीच सरकारको आलोपालो नेतृत्व गर्ने सहमतिबाट प्रचण्ड पछि हटेर प्रधानमन्त्रीलाई सहयोग गरेको, वरिष्ठ नेता माधव नेपालले एमालेको संसदीय दलको नेतामा ओलीलाई प्रस्ताव गरेको भन्दै उहाँले प्रधानमन्त्री ओलीमा म नै राज्य हो भन्ने अहमले गर्दा समस्या निम्त्याएको दाबी गर्नुभयो ।

‘प्रतिनिधि सभाको पुनर्स्थापना हुन्छ, नेकपा र सूर्य चिह्न हाम्रो हुनेछ’, उहाँले भन्नुभयो, ‘सरकार हामी बनाउँछौँ, दुई वर्ष पनि बहुमत पनि हाम्रो हुनेछ ।’ आत्मालोचनासहित आएमा प्रधानमन्त्री ओलीलाई पार्टीमा ल्याइने उहाँको भनाइ छ ।

कार्यक्रममा संविधानसभा सदस्य दलबहादुर सुनार, नेकपा बाँकेका अध्यक्ष आईपी खरेल, सचिव अशोक कोइरालाले आफूहरु नै आधिकारिक भएको दाबी गर्नुभयो ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।