प्रतिनिधि सभा पुनर्स्थापना : प्रचण्ड–माधव समूहकाे 'खुसीयाली जुलुस', ‘अब देश संविधानबाट चल्छ’

फागुन १२, २०७७ बुधबार १८:१३:१ | उज्यालो सहकर्मी

काठमाण्डौ – सर्वोच्च अदालतले प्रतिनिधि सभा विघटन गर्ने सरकारको कदम असंवैधानिक ठहर्‍याउँदै पुनर्स्थापना गरेपछि नेपाल कम्युनिस्ट पार्टी (नेकपा) को प्रचण्ड–माधव समूहले बुधवार काठमाण्डौमा खुसीयाली जुलुस निकालेको छ ।

काठमाण्डाैकाे शान्तिवाटिकामा भेला भएको जनसमुदायले सरकारको असंवैधानिक कदम न्यायालयले सच्चयाएको जनाउँदै खुसीयाली साटासाट गरेको थियो । सर्वोच्च अदालतले मङ्गलबार प्रतिनिधि सभा विघटन गर्ने सरकारको निर्णय खारेज गर्दै १३ दिनभित्र बैठक बोलाउन आदेश दिएको थियो ।

सरकारको सिफारिसमा गएको पुस ५ गते राष्ट्रपतिले प्रतिनिधि सभा विघटन गरी आउँदो वैशाखमा मध्यावधि चुनाव घोषणा गर्नुभएको थियो । प्रतिनिधि सभा विघटन गर्ने सरकारको निर्णयको विरोधमा नेकपाको प्रचण्ड–माधव समूह लगायत विभिन्न राजनीतिक दलले देशव्यापी जनप्रदर्शन गरेका थिए ।

शान्तिवाटिकामा भेला भएका दाहाल–नेपाल समूहका नेता तथा कार्यकर्ताले जुलुससहित नगर परिक्रमा गरेका थिए । जुलुसमा समूहकी स्थायी कमिटी सदस्य पम्फा भुसाल र जनार्दन शर्मा, केन्द्रीय सदस्य जीवनराम श्रेष्ठ, हिमाल शर्मालगायतको सहभागिता थियो । जुलुसपछि भृकुटीमण्डपमा सभा आयोजना गरिएको थियो ।

‘अब देश संविधान र संविधानबाट चल्छ, सर्वोच्चबाट सङ्घीय लोकतान्त्रिक गणतन्त्रमाथि कसैले पनि खेलाँची गर्न सक्दैन भन्ने ऐतिहासिक फैसला भएको छ’, नेतृ भुसालले भन्नुभयो । विश्वकै उत्कृष्ट समाजवादी नमुना स्थापना गर्न अब आफूहरूको ध्यान केन्द्रित हुने बताउँदै उहाँले नागरिकको न्याय, समानता र मुक्तिको अभियानलाई पूरा गर्न आफूहरू लागिपर्ने प्रतिबद्धता व्यक्त गर्नुभयो ।

नेतृ भुसालले प्रतिनिधि सभा विघटन गर्ने असंवैधानिक कदमविरुद्ध देशव्यापी सङ्घर्ष गर्न साथ दिने सम्पूर्ण जनसमुदायप्रति पनि आभार व्यक्त गर्नुभयो । नेकपाको प्रचण्ड–माधव समूहले प्रतिनिधि सभा पुनर्स्थापनाको खुसीयालीमा देशभर जनसभाको आयोजना गरेको छ ।

अन्तिम अपडेट: पुस १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्