माओवादी केन्द्रले सङ्गठनात्मक संरचनाबारे गृहकार्य गर्न चार सदस्यीय कार्यदल गठन गर्‍याे

फागुन २६, २०७७ बुधबार १५:६:५७ | उज्यालो सहकर्मी

काठमाण्डाै – नेपाल कम्युनिस्ट पार्टी माओवादी केन्द्रले सङ्गठनात्मक संरचनाबारे गृहकार्य गर्न चार सदस्यीय कार्यदल गठन गरेको छ । बुधवार केन्द्रीय कार्यालय पेरिसडाँडामा बसेको स्थायी कमिटी बैठकले सङ्गठनात्मक संरचनाबारे गृहकार्य गर्न, प्रभावकारी रूप दिइ प्रतिवेदन पेस गर्नका लागि चार सदस्यीय कार्यदल गठन गरेको हो ।

कार्यदलमा स्थायी कमिटी सदस्यहरू गिरिराजमणि पोखरेल, वर्षमान पुन, पम्फा भुसाल र जनार्दन शर्मा रहनुभएको नेकपा माओवादी केन्द्रका नेता नारायणकाजी श्रेष्ठले जानकारी दिनुभयो । उहाँले भन्नुभयो, ‘स्थायी कमिटीको बैठकले पार्टीको अहिलेको समग्र सङ्गठनात्मक स्थितिको यथार्थलाई अगाडि राखेर अबको सङ्गठन निर्माणको यो योजनालाई ठाेस रूप दिन केही दिनभित्रैमा प्रतिवेदन पेस गर्ने गरी चार सदस्यीय कार्यदल गठन गरेको छ ।’

बैठकमा पार्टीका अध्यक्ष पुष्पकमल दाहाल प्रचण्डले नेपाली कांग्रेस र जनता समाजवादी पार्टीसँग भएको वार्ताको सम्बन्धमा जानकारी गराउनुभएको प्रवक्ता श्रेष्ठले बताउनुभयाे । बिहीवार पनि अध्यक्ष प्रचण्डले विभिन्न पार्टीका नेतासँग थप वार्ता गर्ने जानकारी दिनुभएको थियो भने निर्वाचन आयोगले नेकपा माओवादी केन्द्रलाई पठाएको पत्र अध्यक्ष प्रचण्डले बैठकमा पढेर सुनाउनुभएको थियो ।

प्रवक्ता श्रेष्ठले अन्य पार्टीसँग सहमति गरेर निष्कर्षमा पुग्नका लागि गृहकार्य गरिराखेको भन्दै केपी शर्मा ओली नेतृत्वको सरकारलाई समर्थन फिर्ता गर्ने निर्णय नगरिएको पनि बताउनुभयो । उहाँले भन्नुभयो, ‘अब अन्य पार्टीसँग पनि सहमति गरेर एउटा निष्कर्षमा पुग्नका लागि हामी गृहकार्य गरिराखेका छौँ । हामीले समर्थन फिर्ता लिने निर्णय गरेका छैनौँ ।’

स्थायी कमिटी बैठकले पार्टीको आउँदाे चैत २ गते हुने प्रशिक्षणात्मक भेलामा सहभागी हुने नेता तथा कार्यकर्ताको हकमा मापदण्ड निर्धारण गरिएको पनि प्रवक्ता श्रेष्ठले जानकारी दिनुभयो ।

अन्तिम अपडेट: मंसिर २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्