काठमाण्डौ उपत्यकाका ३ सयभन्दा धेरै ठाउँमा मेलम्चीको पानी चुहावट

चैत २९, २०७७ आइतबार १९:५३:८ | उज्यालो सहकर्मी

काठमाण्डाै – पुरानै प्रणालीबाट मेलम्चीको पानी वितरण भएकाले चुहिने (लिकेज) हुने क्रम बढेको छ । काठमाण्डौ उपत्यकाका झण्डै तीन सयभन्दा धेरै ठाउँमा पाइप फुटेर पानी बग्नुका साथै त्यसले नयाँ कालोपत्र सडक बिग्रने र खाल्डा पर्ने समस्या देखिएको डिभिजन सडक कार्यालय काठमाण्डौले जनाएको छ । भर्खरै कालोपत्र गरेका सडकमा समेत पानीले गर्दा खाल्डाखुल्डी बनेका छन् ।

काठमाण्डौ उपत्यका खानेपानी लिमिटेड (केयूकेएल) ले मेलम्चीको पानी वितरणको काम गर्दै आएको छ । मेलम्ची पानीको चुहिने समस्याले गर्दा उपत्यकाका सडकमा बनेका खाल्डा मर्मतका लागि एक करोड रुपैयाँभन्दा धेरै खर्च लाग्ने डिभिजन सडक कार्यालय काठमाण्डौका प्रमुख कुबेर नेपालीले जानकारी दिनुभयो ।

‘अहिले सुरुवातमा साना खाल्डा देखिए पनि बिस्तारै खाल्डा ठूला हुने र सडक बिग्रने क्रम बढ्दै जान्छ’, सडक डिभिजन कार्यालय काठमाण्डौका प्रमुख नेपालीले भन्नुभयो । प्रमुख नेपाली पर्याप्त तयारी नपुगेकाले र पानी वितरणमा नयाँ शैली नअपनाउँदा समस्या भएको बताउनुहुन्छ ।

‘लामो प्रतीक्षापछि आएको मेलम्चीको पानी रोक्ने कुरा भएन तर पानी चुहिएकै कारण सडकमा खाल्डा थपिनु राम्रो होइन’, उहाँले भन्नुभयो । पाइप फुट्दा बनाउने र सडक मर्मत गर्ने काम सम्बन्धित निकायबाटै हुनुपर्ने नेपालीकाे भनाइ छ ।

पाइप फुटेको मर्मत नै नभइकन सडक मर्मत गर्नुको कुनै अर्थ नभएकोले बनाउन सुरु नगरिएको उहाँको भनाइ छ । फुटेको पाइप बनाउनुपर्‍याे भनेर मेलम्ची खानेपानी आयोजनाका उच्च अधिकारीसँग छलफल भइरहेको डिभिजन सडक कार्यालय काठमाण्डौका प्रमुख नेपालीकाे भनाइ छ ।

‘पटक–पटक छलफल गरेर पानी वितरणमा पुरानो शैली अपनाउँदा समस्या हुन सक्छ भनिएको हो तर मेलम्ची खानेपानीसँग सम्बन्धित निकायले त्यसलाई हल्का रूपमा लिएकाले समस्या भयो’, उहाँले भन्नुभयो ।

केयूकेएलका प्रतिनिधिलाई यसबारे छलफल गर्न बोलाइएको उहाँले बताउनुभयो । थुप्रै ठाउँमा पाइप फुटेकाले कहाँबाट स्रोत जुटाउने भन्ने चुनौती थपिएको उहाँको भनाइ छ ।

‘कति ठाउँमा चुहिएको छ, त्यसका आधारमा टाल्न कति खर्च लाग्छ, त्यसको तयारीको काम भइरहेको छ’, नेपालीले भन्नुभयो ।

अन्तिम अपडेट: मंसिर ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

काठमाण्डौ उपत्यकाका ३ सयभन्दा धेरै ठाउँमा मेलम्चीको पानी चुहावट

फाइल फाेटाे

तपाईको प्रतिक्रिया