इलाम – बकर–इद (इदुल जोहा) पर्वको अवसरमा प्रदेश-१ सरकारले बुधबार प्रदेशभर सार्वजनिक बिदा दिएको छ । 

तर प्रदेश नम्बर १ को सरकारले गरेको निर्णयलाई सोही प्रदेशका जिल्ला प्रशासन कार्यालयहरुले भने बिदाको अवज्ञा गर्दै इलामका सम्पूर्ण विषयगत कार्यलयहरु खुल्ला गरिएको छ ।  

बिदाका दिन समेत इलाम जिल्लामा रहेका संघीय सरकार मातहतका विषयगत कार्यालयहरुले आफ्नो नियमित कार्य सम्पादन गरिरहेका छन्  । संघीय सरकारबाट आधिकारिक रुपमा केही जानकारी नआएको भन्दै सार्वजनिक बिदा नदिएको जिल्ला प्रशासन कार्यालय इलामका प्रमुख जिल्ला अधिकारी श्रवणकुमार तिमल्सिनाले बताउनुभयो ।  

उहाँले भन्नुभयो, ‘गृह मन्त्रालयबाट बिदासम्बन्धी आधिकारिक पत्र नआएकोले संघीय सरकार मातहत रहेका सम्पूर्ण विषयगत कार्यालयहरुमा बिदा नगरिएको हो ।’ 

जिल्लाका जिल्ला प्रशासन कार्यालय, कोष तथा लेखा नियन्त्रक कार्यालय, मालपोत कार्यालय,  नापी कार्यालय, जिल्ला हुलाक कार्यालय लगायतले आफ्नो नियमित कार्य सुचारु गरिरहेका छन् । 

पत्र प्राप्त नभए पनि छिमेकी जिल्लाहरुमा सम्पर्क गरी बुझ्दा बिदा नदिएको जानकारी आएकाले बिदा नगरेको अधिकारी तिमल्सिनाको भनाई छ । तर स्थानीय तहको मातहतमा रहेका कार्यालय र शैक्षिक संस्थामा भने बिदा नै गरिएको छ । 

प्रदेश सरकारले मंगलबार एक सूचना जारी गर्दै बकर–इद (इदुल जोहा)को अवसरमा बुधबार सार्वजनिक बिदा दिन सबै जिल्ला प्रशासन कार्यालयलाई जानकारी गराएको थियो । 

प्रदेश सरकारले प्रदेशका सबै जिल्ला प्रशासन कार्यालयलाई पत्राचार गर्दै २९ चैत २०७४ को मन्त्रिपरिषदको बैठकले निर्णय गरी राजपत्रमा समेत प्रकाशित भएको जानकारी सहित बकर–इद (इदुल जोहा) पर्वमा बुधबार सार्वजनिक बिदा दिन जानकारी गराएको थियो ।

यस अघि साउन २४ गते विश्व आदिवासी दिवसको अवसरमा समेत प्रदेश सरकारले प्रदेशभर सार्वजनिक विदा दिने निर्णय गरेको थियो । 

त्यसबेलासमेत प्रदेशभरका विषयगत कार्यालयहरु खुल्ला गरिएको थियो । यस गतिविधिले देशमा संघियता लागू भएपनि आवश्यक समन्वयको अभाव देखिएको छ ।