काठमाण्डौ - काठमाण्डौको चन्द्रागिरी नगरपालिकाको नागढुङ्गामा ‘स्वास्थ्य जाँच केन्द्र’ स्थापना भएको छ ।

विश्वका विभिन्न देशसहित नेपालमा पनि नयाँ भेरियन्टसहितको दोस्रो चरणको कोरोना सङ्क्रमण फैलिएपछि काठमाण्डौ उपत्यका भित्रिने मुख्य नाकाका रूपमा रहेको चन्द्रागिरीको नागढुङ्गामा स्वास्थ्य जाँच केन्द्र स्थापना गरिएको हो।

केन्द्रमा त्यही नाका हुँदै काठमाण्डौ उपत्यका भित्रिने गाडीका चालक, सहचालक तथा  कर्मचारीको स्वास्थ्य जाँच गरिने छ ।

चन्द्रागिरीमा दुई हजार ३७९ जनालाई कोरोना सङ्क्रमण देखिएको नगरपालिकाका प्रवक्ता हरिभक्त महर्जनले जानकारी दिनुभयो । तीमध्ये दुई हजार १८१ निको भएर घर फर्किसकेका छन् भने १५८ होम आइसोलेशन र १४ जना अस्पतालमा उपचारत छन् । अहिले चन्द्रागिरीमा कोरोनाका कारण २६ जनाले ज्यान गुमाइसकेका छन् ।

नगरपालिकाले नगरपालिकामा निषेधाज्ञा अवधिभर अत्यावश्यकबाहेक सबै सेवा बन्द गर्ने निर्णय गरेको छ ।