अक्सिजन वितरणकाे जिम्मा स्वास्थ्य मन्त्रालयले लियाे

 बैशाख ३१, २०७८ शुक्रबार २०:१२:२० | उज्यालो सहकर्मी
unn.prixa.net

काठमाण्डाै – सरकारले अक्सिजन आपूर्तिमा अस्पतालहरूमा लगाएको कोटा प्रणाली खारेज गरेकाे छ । अक्सिजनको व्यवस्थापनको जिम्मेवारी स्वास्थ्य मन्त्रालयले पाएपछि विज्ञप्ति निकालेर स्वास्थ्य मन्त्रालयले कोटा सिस्टम खारेज भएको जानकारी दिएको छ ।

स्वास्थ्य मन्त्रालयले सबै अक्सिजन उत्पादक उद्योगलाई सम्बोधन गर्दै अस्पतालमा पहिलेकै जस्तै नियमित ढुवानी प्रक्रियाबाट अक्सिजन उपलब्ध गराउन निर्देशन दिएको हो ।

काठमाण्डाै उपत्यकाका अक्सिजन उद्योगबाट अस्पतालमा अक्सिजन सप्लाइ गर्दा सरकारले कोटा सिस्टममा वितरण गर्ने व्यवस्था गरेपछि सरकारी अस्पतालमा समेत अक्सिजन अभावको अवस्था देखिएको थियो ।

काेभिड १९ सङ्कट व्यवस्थापन केन्द्र (सीसीएमसी) को बैठकले निर्णय गरी लागू गरेको कोटा सिस्टमबाट झनै अक्सिजनको हाहाकार भएपछि सीसीएमसीले गर्दै आएको अक्सिजन वितरण प्रणालीलाई व्यवस्थित गर्ने जिम्मेवारी स्वास्थ्य तथा जनसङ्ख्या मन्त्रालयले नै पाएको छ ।

सीसीएमसीले स्वास्थ्य मन्त्रालयलाई नै जिम्मेवारी दिएपछि अक्सिजन वितरण व्यवस्थापनका लागि स्वास्थ्य मन्त्रालयले उच्चस्तरीय टोलीसमेत गठन गरेको छ ।    

अन्तिम अपडेट: असार ५, २०७८

तपाईको प्रतिक्रिया