काठमाण्डाै – मेलम्ची खानेपानी आयोजनाबाट वितरित पानीको चुहावट मर्मत गर्नका लागि सरकारले १३ करोड रुपैयाँ दिने निर्णय गरेको छ । मन्त्रिपरिषद्को बैठकले मेलम्ची आयोजनाको पानी वितरणको क्रममा चुहावट भएका पाइप र प्रणाली मर्मतका लागि १३ करोड रुपैयाँ दिने निर्णय गरेको सञ्चार तथा सूचना प्रविधि मन्त्री तथा सरकारका प्रवक्ता पार्वत गुरुङले जानकारी दिनुभयो ।

विशेषगरी पुरानै प्रणालीबाट खानेपानी वितरण भएका ठाउँमा पाइप फुट्ने र सडक पनि भत्किने समस्या देखिएको छ । यसको मर्मतका लागि सरकारले १३ करोड रुपैयाँ दिएको हो ।

यस्तै सरकारले भारतबाट सरकार–सरकारबीचको सम्झौता अर्थात् जी टू जी मोडलबाट रसायनिक मल किन्न कृषि तथा पशुपक्षी विकास मन्त्रालयलाई स्वीकृति दिएको छ ।

यस्तै चीनले अनुदानमा दिने तीन हजार थान अक्सिजन सिलिन्डर स्वीकार गर्ने, हरेक वर्ष पुस ११ गते राष्ट्रिय ज्येष्ठ नागरिक दिवस मनाउने, प्रेस काउन्सिलको अध्यक्षमा बालकृष्ण बस्नेतलाई नियुक्त गर्ने लगायतका निर्णय पनि गरेको छ ।