पाकिस्तानी टिमभन्दा बाहिर रहेका तीव्र गतिका बलर मोहम्मद इरफान टी – २० क्रिकेटमा सवैभन्दा किफायती बलर बनेका छन् ।

उनी २ वर्षदेखि पाकिस्तानको राष्ट्रिय टिममा पर्न सकेका छैनन् । तर टी –२० को ४ ओभर बलिङ गर्दा सबैभन्दा थोरै रन दिएर नयाँ कीर्तिमान राखेका हुन् ।

क्यारेबियन प्रिमियर लिग सीपीएलमा बारबाडोस ट्रिन्डिडाका ३६ वर्षीय बलर इरफानले नेपाली खेलाडी सन्दीप लामिछाने आवद्ध टिम सेन्ट किट्स एण्ड नेभिस पेट्रियट्सविरुद्ध बलिङ गर्दा ४ ओभरमा तीन ओभर मेडन राखेका थिए भने १ रन दिएर २ विकेट लिएर रेकर्ड बनाएका हुन् ।
 
बायाँ हाते तीव्र गतिका बलर इरफानले ४ ओभरको २४ बलमध्ये २३ बलमा ब्याट्सम्यानले रन बनाउन सकेनन् । उनले सेन्टकिट्सका क्रिस गेल र इविन लुईसलाई आउट गरेका थिए । तर उनले उत्कृट बलिङ गर्दै रेकर्ड बनाए पनि आइतबारको खेलमा उनको टिम बारबाडोस भने पराजित भएको थियो ।
 
पाकिस्तानी बलर इरफानले राष्ट्रिय टिमका लागि अहिलेसम्म २० वटा टी –२० खेलेका छन् । जसमा उनले १५ विकेट लिएका छन् । अन्तर्राष्ट्रिय टी–२० मा उनको १८ रनमा २ विकेट उच्च प्रदर्शन रहेको छ ।