खाल्डाखुल्डी पुर्न र सडक विस्तारका बाँकी काम छिटो सक्न निर्देशन

भदौ १३, २०७५ बिहीबार ५:४०:३२ | रासस

काठमाडौं - प्रधानमन्त्री तथा मन्त्रिपरिषद्को कार्यालयले खाल्डाखुल्डी मर्मतसहित सडक विस्तारका क्रममा बाँकी रहेका काम तत्काल सम्पन्न गर्न सम्बन्धित निकायलाई निर्देशन दिएको छ ।

चाबहिल–बौद्ध–जोरपाटी र कलङ्की–नागढुंगा सडकको अनुगमनका क्रममा तीव्र गतिमा सडक विस्तारका काम हुन नसकेको पाइएको भन्दै मन्त्रिपरिषद् कार्यालयले सडकमा रहेका बिजुली र टेलिफोनका पोल तथा तार हटाउन निर्देशन दिएको हो । सडकमा भएका खाल्डाखुल्डी पुर्ने, सडकमा आउने पानीलाई नालीमार्फत मुख्य ढलमा पठाउने र निर्माण सामग्री तथा फोहोरमैलाको उपयुक्त स्थानमा व्यवस्थापन गर्ने प्रबन्ध मिलाउन निर्देशन दिइएको प्रधानमन्त्रीको कार्यालयले जनाएको छ ।

कार्यालयले मंगलबार गरेको अनुगमनका क्रममा चाबहिल–बौद्ध–जोरपाटी सडक दुई वर्षको योजना अवधिमा करीब ३० प्रतिशत मात्र काम सम्पन्न भएको पाइएको थियो । सडक विस्तार आयोजना बानेश्वरको जिम्मेवारीमा रहेको उक्त सडक खण्डका केही ठूला खाल्डाखुल्डी पुरिएको भएतापनि अझै सडकमा स–साना खाल्डाखुल्डी देखिएको छ ।

अनुगमनका क्रममा विद्युत् र टेलिफोनका पोल तथा तार हटाउने कार्य प्रतिबद्धताअनुसार नभएको पाइएको प्रधानमन्त्री कार्यालयका प्रवक्ता बिनोदबहादुर कुँवरले बताउनुभयो । सडक छेउको नाली तथा पैदल मार्गको मध्यभागमा नयाँ पोल गाडिएको भेटिएको छ । त्यस्तै निर्माण सामग्री यत्रतत्र छरिएर राखिएको अवस्थामा पाइएको थियो ।

कलङ्की–नागढुंगा सडकखण्डमा तुलनात्मक रुपमा सुधारको काम भइरहेको भेटिएको छ । महाशक्ति पेट्रोलपम्प नजिकको सडकखण्डको पोल र तार हटाई ढलानको कार्य भइरहेको उहाँले बताउनुभयो । त्रिभुवन पार्क थानकोटदेखि बञ्जला सप्लायर्ससम्म दुवैतर्फको बाटो, पोल र तारको व्यवस्थापन भइसकेको छ । हाइभिजनबाट माउन्ट सगरमाथा ब्रिलियन्ट एकेडेमीसम्म तार, पोल हटाई सडक कालोपत्रे गरिसकिएको छ ।

बलम्बु स्याटेलाइट स्टेशनदेखि तल सडकमा ग्रेडर लगाएर सम्याइएको, सार्वजनिक भवनको अगाडिको भाग खाली गराई सडक मर्मतको काम थालिएको छ । सतुङ्गलबाट वल्र्डलिङ्कको भवनसम्मको सडक कालोपत्रेका लागि आधार तयार भएको, चौधरी ग्रुप कम्पनी अगाडि एकतर्फी कालोपत्रे भएको र सतुङ्गल सिप्रदी ओरालोदेखि बल्खु पुलसम्मको सडकको पोल तथा तार हटाइ सडक निर्माण सम्पन्न भइसकेको प्रवक्ता कुँवरले बताउनुभयो ।

कलङ्की नागढुङ्गा सडक खण्डको केही क्षेत्रमा सडक अतिक्रमण गरी बनाइएको घर, टहरा हटाउन र सडक विस्तारको सीमाङ्कनको टुङ्गो नलाग्दा सडक विस्तारको काम बाँकी छ । महाशक्ति पेट्रोल पम्पदेखि मंगलोदय माध्यामिक विद्यालय थानकोटसम्मको सडकमा पोल सार्न र सडक अतिक्रमण गरी बनाइएको घर हटाउन पनि बाँकी छ ।

त्रिभुवन पार्क थानकोटको ओरालोमा बढी खाल्डाखुल्डी भएको पाइएको छ । उक्त क्षेत्रमा सडक छेउका पर्खालको निर्माण सम्पन्न भइसकेको छ । तर बिजुलीको पोल नहटाउँदा सडक विस्तार गर्न सकिएको छैन । हाइभिजन–माउन्ट सगरमाथा ब्रिलियन्ट एकेडेमीदेखि दूरसंचार प्राधिकरणको कम्पाउण्डसम्म, आदर्श नगर टोलदेखि नैकाप तीनथाना फेमिली मार्टसम्म र सतुङ्गल मुख्य बजारमा तार, पोल हटाउने काम बाँकी रहेको बताइएको छ ।

प्रधानमन्त्री केपी शर्मा ओलीले गत साउन १६ गते कलङ्की¬–नागढुंगा सडक र चाबहिल–जोरपाटी सडक कालोपत्रे र करिडोरका सडकको निर्माण एवं मर्मतसम्भारलाई प्राथमिकता दिई यही भदौ १५ गतेभित्र सम्पन्न गर्न निर्देशन दिनुभएको थियो । उपत्यकाको प्रमुख सडकका खाल्डाखुल्डी तत्काल पुरी मुख्य सडकमा सडक बत्तीको व्यवस्था गर्नसमेत उहाँले निर्देशन दिनुभएको थियो ।

सडक विस्तार आयोजना बानेश्वरका इन्जिनीयर विश्वविजयलाल श्रेष्ठले चाबहिल–जोरपाटी सडक खण्डको सडकमा रहेको खाल्डाखुल्डी पुर्ने कार्य सम्पन्न भएको बताउनुभयो । उहाँले भन्नुभयो, “हामीले चाबहिल जोरपाटी सडकमा रहेका खाल्डाखुल्डी पुरिसकेका छौँ, लगातारको बर्षाको कारण सडक कालोपत्रे गर्ने काम हुन सकेको छैन्, चालु आवको अन्त्यसम्म सबै सडक कालोपत्रे गरिसक्छौँ ।”

जतिसक्दो सडक विस्तार र मर्मत सम्पन्न गर्न ठेकेदार कम्पनीलाई पटकपटक ताकेता गरिएको इन्जिनीयर श्रेष्ठले बताउनुभयो । चाबहिल–साँखु र त्रिपुरेश्वर–नागढुंगा सडकको विस्तार र मर्मतको काम विभिन्न नौ वटा ठेकेदार कम्पनीले गर्दै आएका छन् ।

चाबहिल–साँखु र त्रिपुरेश्वर–नागढुंगा सडकको कूल लम्बाई १२।५ किलोमिटर छ । सङ्घीय राजधानी भित्र्ने प्रमुख नाकाका रुपमा रहेको नागढुंगा–त्रिपुरेश्वर सडकको अवस्था जीर्ण हुँदा दैनिक हजारौँ यात्रुले कष्टकर यात्रा गरिरहनु परेको छ । सडकमा ठूल्ठूला खाल्डाखुल्डी हुँदा घन्टौँसम्म सवारी जाम हुने गर्छ । सडक आसपासका बासिन्दा घाम लाग्दा धुलो खान र पानी पर्दा हिलो व्यहोर्न बाध्य छन् ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्