वर पीपलको माझमा यो लक्ष्मीनारायणको मन्दिर (फोटोफिचर)

भदौ १६, २०७५ शनिबार १०:४७:६ | श्यामशितल परियार

लमजुङ – हरियाली जंगलले घेरिएको । विभिन्न चराचुरुङ्गीको मधुर चिरबिरचिरबिर । शीतल पवन । त्यही पवन सँगसँगै ‘बयली’ खेल्दै टहलिन पाउँदा को पो खुशी नहोला र ? शान्त अनि मनोरम प्राकृतिक वातावरणमा रहेको धार्मिक एवम् ऐतिहासिक महत्वको लक्ष्मीनारायण मन्दिरको दर्शन गर्न पाउँदा जोकोहीले ‘स्वर्गकै अनुभूति’ गर्छन् ।

सिउँडीबार–खत्रीठाँटी सडकको आडैमा पर्छ, लमजुङको सुन्दरबजार नगरपालिका–६, मा रहेको लक्ष्मीनारायण मन्दिर । सिँढी बिच्छ्याइएको उकालो बाटो हिँडेपछि केही मिनेटमै वरपीपलको माझमा रहेको ऐतिहासिक लक्ष्मीनारायण मन्दिर आइपुगिहाल्छ । थोरै उकालो बाटो चढ्दै गर्दा दायाँबायाँ विभिन्न देउताका मूर्ति र मन्दिर पनि देख्न सकिन्छ । यहाँ नागको थान, हनुमानको मूर्ति समेत देख्न सकिन्छ ।

मनले चिताएको पुग्ने विश्वास

प्रत्येक साँझबिहान यस मन्दिरमा स्थानीयले पूजाआजा गर्छन् । निकै पुरानो मानिने यस मन्दिरमा पूजाआजा गर्दा घरपरिवारमा सुख शान्ति छाउने, मनोकांक्षा पूरा हुने धार्मिक विश्वास रहेको मन्दिरमै भेटिनुभएका संस्कृतिप्रेमी दिनानाथ कोइरालाले बताउनुभयो । ‘यो पुरानो मन्दिर हो । यहाँ पूजा गरेमा सुखशान्ति छाउने, मनले चिताएको पुग्ने विश्वास रहेको छ’, उहाँले भन्नुभयो ।

मन्दिरको ५२ रोपनी जग्गा रहेको छ । मन्दिर परिसरमैै पिकनिक स्थल, बाल उद्यानका साथै विभिन्न खेल मैदान बनाईएको छ । ठाडोभाका शिरोमणि स्व. भेँडीखर्के साहिँलाको शालिक बन्दै छ ।

प्रकृतिमा हराउन खोज्नेका लागि राम्रो गन्तव्य

अहिले प्राकृतिक सुन्दरतामा लट्ठिन चाहने, साथीभाइसँग भेटघाट गर्ने, पिकनिक खान चाहनेहरुको राम्रो गन्तव्य बनेको छ, लक्ष्मीनारायण मन्दिर ।

पिकनिकका लागि आवश्यक पुर्वाधार पनि खडा गरिएको छ । पानी बिजुलीको राम्रो प्रबन्ध गरिएको छ । यस मन्दिरलाई धार्मिक पर्यटनको रुपमा विकास गर्न सकिने सम्भावना रहेको छ ।

मन्दिरको संरक्षण÷संवद्र्धन र प्रवद्र्धनका लागि विभिन्न निकायसँग पहल भैरहेको लक्ष्मीनारायण मन्दिर संरक्षण विकास समितिका अध्यक्ष परमेश्वर अधिकारीले बताउनुभयो ।

‘यो ऐतिहासिक महत्वको धार्मिक मन्दिर हो । हामीले स्थानीय सरकार, प्रदेश सरकार र केन्द्रीय सरकारलाई यसको महत्व बुझाएर मन्दिरको प्रवर्द्धनमा सहयोग जुटाउने पहल गरिरहेका छौँ,’ उहाँले भन्नुभयो ।

धार्मिक पर्यटकीय केन्द्र बनाउन सकिने सम्भावना

नगरपालिकाको समृद्धि र पहिचानका लागि नगरभित्र रहेको धार्मिक एवम् ऐतिहासिक महत्वका सम्पदाहरुको संरक्षणमा नगरपालिकाले काम गरिरहेको सुन्दरबजार नगरपालिकाका मेयर जनकराज मिश्रले बताउनुभयो ।‘हाम्रो नगरभित्र ऐतिहासिक एवम् धार्मिक महत्वका थुप्रै सम्पदा छन् ।

ती सम्पदाको संरक्षण÷संवर्द्धन र प्रवर्द्धनका लागि हामीले काम गरिरहेका छौँ । यहाँ धार्मिक पर्यटन, साँस्कृतिक पर्यटनको विकास गरी युवालाई यहीँ स्वरोजगार बनाउन सक्ने सम्भावना छ । त्यसैले हामी यसको क्षेत्रको विकासमा अवश्य जुट्छौँ’, उहाँले थप्नुभयो ।

आवश्यक विभिन्न संरचना बनाई उचित प्रचारप्रसार हुन सके लक्ष्मीनारायण मन्दिरलाई धार्मिक पर्यटन क्षेत्रको रुपमा विकास गर्न सकिने सम्भावना देखिन्छ । यस मन्दिरको संरक्षण संवद्र्धनमा स्थानीयसंगै स्थानीय सरकारले दिल खोलेर सहयोग गर्नु आवश्यक रहेको सरोकारवालाहरु बताउँछन् ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्