काठमाण्डाै – संसद्को अवरोध हटाउने विषयमा सभामुखले बोलाउनुभएको सर्वदलीय शीर्ष नेताको बैठकमा नेकपा एमाले सहभागी नहुने भएको छ । सभामुखले बाहिर देखाउनकै लागि छलफलको नाटक गरेकाले आफूहरू सहभागी नहुने एमालेका प्रमुख सचेतक विशाल भट्टराईले उज्यालोलाई जानकारी दिनुभयो ।

‘यो समस्या सभामुख र एमालेबीचको समस्या हो, प्रधानमन्त्रीसहित अरू दलका नेताहरूलाई बोलाएर सभामुखले नाटक मञ्चन गर्न खोज्नुभएको छ, समस्या समाधान गर्ने उद्देश्यले नभइ उहाँले सहानुभूति बटुल्न र सहमतिको प्रयास गरेको नाटकका लागि मात्रै छलफल गर्न खोज्नुभएको हो, यसमा एमाले सहभागी हुँदैन’, भट्टराईले भन्नुभयो । 

यदि सभामुखले साँच्चै समस्या समाधान गर्न खोजेको हो भने सिधै अध्यक्ष ओलीसँग भेटेर कुरा गर्नुपर्ने एमालेको माग रहेकाे प्रमुख सचेतक भट्टराईले जानकारी दिनुभयो । 

‘हामीले सभामुखबाट अतिरिक्त दयामाया मागेको होइन, अरू दलसरहको व्यवहार खोजेको हो, उहाँ सत्तापक्षको व्यक्तिको रूपमा प्रस्तुत हुनु भएन भन्ने मात्रै हो, त्यस्तो नभसम्म सहमति हुन्न’, उहाँले भन्नुभयो । 

सभामुख अग्निप्रसाद सापकोटाले संसद्को काम कारबाहीलाई प्रभावकारी रूपमा अगाडि बढाउन आज दिउँसो साढे २ बजे सर्वदलीय बैठक बोलाउनुुभएको हो ।