न्यूनतम साझा कार्यक्रम र सङ्कल्प प्रस्ताव ल्याउनु ठूलो कुरा होइन,...
चैत १५, २०८० बिहिबार
काठमाण्डाै – नेपाली कांग्रेसका केन्द्रीय सदस्य तथा सांसद गगन थापाले प्रमुख प्रतिपक्ष दलका नेता केपी शर्मा ओलीलाई संसद्सँग घृणा जागेका कारण संसदमा अवरोध सिर्जना गर्ने गरेको बताउनुभएको छ ।
आज बिहीवार प्रतिनिधि सभाको बैठकपछि सञ्चारकर्मीसँग कुरा गर्दै नेता थापाले संसदप्रति ओलीको घृणा सिङ्गो नेकपा एमालेमा पनि पुगेको भन्दै एमाले संसदीय मर्यादामा बस्न नसकेको बताउनुभयो ।
उहाँले भन्नुभयो, ‘केपी शर्मा ओलीलाई संसद्सँग घिन लाग्छ, उहाँलाई संसद् देख्नै हुन्न । उहाँले आफ्नो कार्यकालभरि संसद्लाई हेप्नुभयाे । संसद्लाई बेवास्ता गर्नुभयाे । पटक–पटक भङ्ग गर्नुभयो । अहिले संसद् पुनर्स्थापित भइसकेपछि उहाँलाई संसद्सँग यति घृणा लाग्छ कि यो संसद्लाई उहाँले पङ्गु बनाउनुभएको छ । अहिलेको हर्कत हेर्दै गर्दा सिङ्गो नेकपा एमालेलाई संसद्प्रतिको व्यक्तिको घृणाबाट पार्टीमा पुग्यो भन्न कर लागेको छ ।’
नेता थापाले प्रमुख प्रतिपक्ष दलको अवरोधका कारण सांसदहरूले बजेटको विषयमा बोल्न नपाएको उल्लेख गर्नुभयो । एमालेको अवरोधले सांसदहरूले संसदमा आफ्नो भूमिकासमेत निर्वाह गर्न नपाएको बताउनुभयो । एमालेको प्रस्तुतिले संसदीय पद्धतिको गरिमा राख्न नसक्ने उहाँको भनाइ ।
फरक प्रसङ्गमा नेता थापाले पार्टीको १४ औँ महाधिवेशन समयमै हुनेमा अन्योल भएको बताउनुभएको छ ।