काठमाण्डाै – काठमाण्डाै महानगरपालिकाले पानीको स्रोत जोगाउन भूमिगत पानी पुनःभरण र आकासेपानी सङ्कलन प्रणाली निर्माण थालेको छ ।

मेयर विद्यासुन्दर शाक्यले नन्दी स्कुलमा आकासे पानी सङ्कलन तथा भूमिगत पानी पुनःभरण प्रणाली निर्माणको शिलान्यास गर्दै आकासे पानी संकलन र भूमिगत पानी पुनर्भरण कार्यक्रमलाई प्राथामिकता दिएको बताउनुभयो । उहाँले प्राणी जीवन र वातावरण दुवै क्षेत्रमा पानी नभई नहुने भएकाले सम्भावित जोखिमबाट बच्न कामपाले आकासेपानी सङ्कलन र भूमिगत पानी पुनःभरण प्रणाली निर्माण गर्न योजना बनाएर अगाडि बढाएको बताउनुभयो ।

अहिले इनार तथा डीप बोरिङबाट पानी निकाल्ने तर पुनर्भरणका लागि ध्यान नदिदा समस्या आउने भएकोले पुनर्भरणलाई प्राथामिकता दिने उहाँले बताउनुभयो । महानगरपालिकाले अहिले खाली जग्गा भएका वडा कार्यालय, सार्वजनिक जग्गा, बिद्यालय लगायतमा जमिन पुन:भरण प्रणाली स्थापना गर्ने काम गरिरहेको छ ।