चिलिमे त्रिशूली प्रसारण लाइनको ७४ प्रतिशत काम सकियो

असोज १२, २०७८ मंगलबार १२:३२:९ | उज्यालो सहकर्मी

रसुवा - चिलिमे त्रिशूली २२० केभी प्रसारण लाइन निर्माणको ७४ प्रतिशत काम सकिएको छ ।

आयोजनाका अनुसार सबस्टेसनतर्फ ५० र प्रसारण लाइन निर्माणतर्फ ४५ प्रतिशत काम सकिएको छ । आयोजनामा निर्माण हुने ७९ वटा टावरमध्ये चार वटा निर्माण सम्पन्न भएको छ । ३१ वटाको फाउण्डेसन निर्माण भएको आयोजनाले जनाएको छ । यस्तै सबस्टेसनतर्फ कन्ट्रोल रुम बिल्डिङ, प्रोटेक्सन लगायतको काम भइरहेको छ ।

२०७८ चैतसम्ममा निर्माण सकिने गरी आयोजनाले काम गरिरहेको आयोजना प्रमुख सुभारम्भ विक्रम शाहले बताउनुभयो । अबको ६ महिनामा काम सम्पन्न गर्ने लक्ष्य रहे पनि कामले तीव्रता पाएको छैन ।

‘कामलाई गति नदिएका कारण हामीले यसपटक ठेकेदारलाई कारबाही पनि गरेका छौँ’, उहाँले भन्नुभयो, ‘चैतसम्ममा काम सम्पन्न गर्नका लागि ठेकेदारलाई निर्देशन दिएका छौँ।’ यस पटक बर्खाको बेलामा पहिरोका कारण प्रसारण लाइनतर्फ क्षति गरेको थियो । खनिएको फाउण्डेसन पहिरोले क्षति गरेको उहाँले बताउनुभयो ।

२०७४ साल पुस ५ देखि प्रसारण लाइन निर्माण सुरु भएको आयोजनाको २०७६ साल जेठ ३० मा निर्माण सम्पन्न गर्ने कार्ययोजना रहेको थियो । भौगोलिक विकटता, सडकको पहुँच नपुगेको, डिजाइनमा धेरै समय लागेको, सबस्टेसन निर्माणका लागि जग्गा अधिग्रहणमा ढिलाइ, वैदेशिक सहायता पर्खनुपर्ने, जग्गा सट्टा, रुख कटानका लागि समयमै अनुमति नपाउनु लगायतका कारणले ढिलाइ भएको आयोजनाले जनाएको छ ।

रसुवाको माथिल्लो क्षेत्रमा निर्माण हुने जलविद्युत् आयोजनाबाट उत्पादन हुने विद्युत् राष्ट्रिय प्रसारण लाइनमा जोड्नका लागि प्रसारण लाइन निर्माण गरिएको हो । प्रसारण लाइन निर्माणका लागि २०७४ कार्तिक २७ मा ठेक्का सम्झौता भएको थियो ।

रसुवाको आमाछोदिङ्मो गाउँपालिकामा रहेकाे गोल्जुङदेखि नुवाकोटको किस्पाङ गाउँपालिकामा रहेकाे त्रिशूली थ्री बी हबसम्म प्रसारण लाइन निर्माण हुने छ । प्रसारण लाइनको दूरी साढे २७ किलोमिटर रहेको छ ।

गोल्जुङदेखि मैलुङसम्म २२० केभी डबल सर्किट र मैलुङदेखि त्रिशूली थ्री बीको हबसम्म ‘फोर सर्किट’ प्रसारण लाइन निर्माण हुनेछ । गोल्जुङदेखि थ्री बी हबसम्म ७९ वटा टावर रहने बताइएको छ।

प्रसारण लाइन र सबस्टेसन निर्माणका लागि नेपाल सरकार, जर्मन सहयोग नियोग केएफडब्ल्यूकाे अनुदान तथा युरोपियन इन्भेष्टमेन्ट बैंकको ऋण लगानी छ । प्रसारण लाइन निर्माणपश्चात जिल्लाको गोसाइँकुण्ड गाउँपालिका र आमाछोदिङ्मो गाउँपालिकामा निर्माणाधीन जलविद्युतको विद्युत् जोडिने छ।

यो प्रसारण लाइनमा २१६ मेगावाटको माथिल्लो त्रिशूली एक, १२० मेगावाटको रसुवा भोटेकोशी, १११ मेगावाटको रसुवागढी, ७८ मेगावाटको साञ्जेन खोला, ४२.५ मेगावाटको साञ्जेन, २० मेगावाटको लाङटाङखोला, १४.८ मेगावाटको माथिल्लो साञ्जेन, ६.४२ मेगावाटको माथिल्लो मैलुङ 'ए' जलविद्युत् आयोजनाको विद्युत् जोडिने छ।

यो प्रसारण लाइनमा ५ सय मेगावाट विद्युत् जडान गर्न सकिने छ ।

अन्तिम अपडेट: माघ १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्