रियल मड्रिडबाट युभेन्टसमा गएका पोर्चुगिज फुटबल स्टार क्रिस्टियानो रोनाल्डोले नयाँ क्लबका लागि अहिलेसम्म गोल गर्न सकेका छैनन् । 

यो सिजनको सिरी ए मा आफूले खेलेका तीन वटै खेल जिते पनि रोनाल्डोले भने बललाई जाली चुमाएका छैनन् । 

रोनाल्डोले गोल गर्न नसकिरहँदा जुनियर रोनाल्डोले भने युभेन्टस यु–९ टिमबाट डेब्यू खेलमै चार गोल गरेका छन् । रोनाल्डोका आठ वर्षीय छोरा क्रिस्टियानो जुनियर बुवाले लगाउने ७ नम्बरकै जर्सीमा युभेन्टस फुटबल एकेडेमीमा अनुबन्ध भएका छन् । 

लुसेन्तो यु–९ विरुद्ध भएको खेलमा जुनियर रोनाल्डोले ४ गोल गरेका हुन् । उक्त खेल युभेन्टस यु–९ ले ५–१ ले जित्यो । जुनियर रोनाल्डोले प्रत्येक हाफमा दुई–दुई गोल गरेका थिए । 

जुनियर रोनाल्डोको प्रदर्शनपछि क्रिस्टियानो रोनाल्डोले आफ्ना छोरा आफ्नै बाटोमा अगाडि बढेको प्रतिक्रिया दिएका छन् । 

शनिबार भएको सिरी एमा पार्माविरुद्धको खेलमा गोल गर्न नसके पनि क्लबले हात पारेको जित र छोराको प्रदर्शनले भने रोनाल्डो खुशी छन् ।