नरेन्द्र मोदी सरकारको महत्वाकांक्षी परियोजना ‘बुलेट ट्रेन प्रोजेक्ट’ अन्तरगत भारतले जापान सँग १८ वटा बुलेट ट्रेन किन्ने तयारी गरेको छ ।

इकोनोमिक्स टाइम्सलाई एक उच्च अधिकारीले भनेका छन्, ‘हामी जापानसँग १८ वटा शिंकनसेन बुलेट ट्रेन किन्दैछौँ । हरेक रेलमा १० वटा डिब्बा हुनेछन् । सबै रेल तीन सय किलोमिटर प्रतिघण्टाका गतिले चल्नेछन् ।’

यी रेलको मूल्य झण्डै ७ हजार करोड रुपैयाँ पर्ने बताइएको छ । दुई देशबीच भएको सम्झौता अनुसार जापानले भारतमै बनाउन मिल्नेगरी प्रविधिमा पनि सघाउनेछ ।

भारतमा पहिलो बुलेट ट्रेन सन् २०२२ को अन्त्यसम्ममा मुम्बईबाट अहमदाबादसम्म चलाउने तयारी छ । यसका लागि ५०८ किलोमिटर लम्बाइ रहेको रेल्वे ट्रयाक बनाउन जापानले सघाइरहेको छ । यो रेलमा इकोनोमी क्लासको टिकटको मूल्य झण्डै तीन हजार भारतीय रुपैयाँ हुन बताइएको छ ।

यो महत्वाकांक्षीका लागि सन् २०१८ को डिसेम्बर जग्गा अधिग्रहणको काम सकिनेछ । यो परियोजनामा १२ वटा स्टेसन हुनेछ । 

सम्झौताअनुसार जापान सरकारले भारतलाई ८८ हजार करोड रुपैयाँ ऋण प्रदान गर्नेछ । जसअनुसार ०.०१ प्रतिशत ब्याजदरको रुपमा ५० वर्षसम्ममा भारतले जापानलाई पैसा फिर्ता गर्नुपर्नेछ ।