काठमाण्डाै – सत्ता साझेदार नेकपा (माओवादी केन्द्र) का सांसद अमनलाल मोदीले गभर्नर महाप्रसाद अधिकारीलाई राष्ट्र बैंक र अर्थ मन्त्रालयबीच ट्युनिङ नमिलेकाे हाे भन्दै प्रश्न गर्नुभएकाे छ  ।

सांसद मोदीले विभिन्न समाचारमाध्यममा आएको समाचारलाई उद्धृत गर्दै गभर्नर अधिकारीले आफ्नो पार्टीका नेतासमेत रहनुभएका अर्थमन्त्री जनार्दन शर्मालाई असफल बनाउन प्रयास गरिरहेकाे भन्नेबारेमा पनि जवाफ माग्नुभएकाे छ । 

आज आइतवार सिंहदरबारमा आयोजित सार्वजनिक लेखा समितिको बैठकमा बोल्दै उहाँले माओवादीबाट मन्त्री बन्नुभएका शर्माले राम्रो काम गर्ने देखेपछि त्यसलाई असफल बनाउन राष्ट्र बैंकले खोजेको समाचार बाहिर आएको भन्दै सत्य के हो ? भनी गभर्नर अधिकारीसँग प्रश्न गर्नुभयो ।

उहाँले भन्नुभयो, ‘ठूलाबडाले बैंकबाट ऋण पाइरहने, सर्वसाधारणले ऋण नपाउने स्थिति छ । त्यसलाई कसरी घटाउने ? जो खाडल छ । तलसम्म बैंक जाने कुरामा कसरी सोच्नुभएको छ ? अर्को एउटा पनि हल्ला छ । विभिन्न समाचारमाध्यमबाट समाचार पनि आउने गरेका छन् । तपाईँहरूको ट्युनिङ पनि मिलिराखेको छैन । राष्ट्र बैंक, त्यसमा अर्थ मन्त्रालय, हामी त माओवादीको कार्यकर्ता । त्यसो भन्दा हाम्रो पार्टीका नेता मन्त्री । माओवादीको मन्त्रीले राम्रो काम गर्छ । उसलाई कसरी असफल बनाउने ? भनेर खोजी राख्नुभएको छ भन्ने पनि छ समाचारमा । यसलाई कसरी सोच्नुभएको छ ? बजारमा त्यो पनि हल्ला छ । तपाईँहरूका ट्युनिङ नमिलिसकेपछि विभिन्न राजनीतिक दृष्टिकोणले पनि हो कि ? के हो ?’