लमजुङमा बर्सेनि वन डढेलोका घटना बढ्दो : सुरक्षा निकायलाई अग्नि नियन्त्रक सामग्री प्रदान

पुष २९, २०७८ बिहीबार २०:२३:४२ | श्यामशितल परियार

लमजुङ – लमजुङमा बर्सेनि वन डढेलाेका घटना बढ्दै गएको छ । विसं २०६८ देखि २०७७ सम्मको अवस्थालाई हेर्दा बर्सेनि जिल्लामा वन डढेलाेका घटना बढ्दै गएको डिभिजन वन कार्यालय लमजुङले जनाएको छ ।

यस अवधिमा सबैभन्दा धेरै मर्स्याङ्दी गाउँपालिका, दोर्दी गाउँपालिका र दूधपोखरी गाउँपालिका क्षेत्रका वनमा डढेलो लागेको डिभिजन वन कार्यालय लमजुङका प्रमुख एवम् डिभिजन वन अधिकृत पूर्णेश्वर सुवेदीले जानकारी दिनुभयो ।

‘जिल्लामा दश वर्षको अवधि (२०६८–२०७७) मा बर्सेनि वन डढेलाेका घटना बढ्दो देखिन्छ’, उहाँले भन्नुभयो । विशेषगरीः भिरालो जमिनमा रहेका सल्ला भएका वन, मान्छेको पहुँच नभएको वनमा बढी डढेलो लाग्ने गरेको उहाँले बताउनुभयो ।

‘प्राकृतिक रूपमा भन्दा पनि मानिसले अन्जानमा या नियतवश वनमा डढेलो लगाइएको हुन सक्ने देखिन्छ’, सुवेदीले भन्नुभयो । वन डढेलो रोकथाम र नियन्त्रणका लागि समुदाय, पालिका, मिडिया लगायत सरोकारवाला सबै पक्ष हातेमालो गरी अघि बढ्नुपर्ने आवश्यकता रहेको उहाँले बताउनुभयो ।

जिल्लामा तीन सय ३९ सामुदायिक वन, एक सय ७३ कवुलियती वन र एक धार्मिक वन गरी पाँच सय १३ वन रहेका डिभिजन वन कार्यालय लमजुङका सहायक वन अधिकृत एवम् सूचना अधिकारी सन्तोष खनालले बताउनुभयो ।

यसैबीच बढ्दो वन डढेलो रोकथाम र नियन्त्रणका लागि डिभिजन वन कार्यालय लमजुङले जिल्लामा रहेका विभिन्न सुरक्षा निकायलाई अग्नि नियन्त्रक सामग्री प्रदान गरेको छ ।

जिल्लास्तरीय वन डढेलो रोकथाम तथा नियन्त्रणसम्बन्धी सरोकारवालाबीच अन्तरक्रिया गर्दै आज बिहीवार जिल्ला प्रहरी कार्यालय लमजुङ, उदीपुरमा रहेकाे नेपाली सेनाको श्रीजङ्ग गण र सशस्त्र प्रहरी बल लमजुङलाई अग्नि नियन्त्रक सामग्री प्रदान गरिएको कार्यालय प्रमुख सुवेदीले बताउनुभयो ।

उहाँका अनुसार वन डढेलो लागेको अवस्थामा आगो निभाउन जाने सुरक्षा टोलीलाई सहज हुने उद्देश्यले विभिन्न सामग्री प्रदान गरिएको हाे ।

प्रमुख जिल्ला अधिकारी सुशील वैद्यले जिल्लामा रहेका सुरक्षा निकायका प्रमुख/प्रतिनिधिलाई रेक, साबेल, स्वाटर, जम्प सुट, ब्याक प्याक पम्प, हेल्मेट, सिम्पल क्याप मास्क, पन्जा लगायतका सामग्री वितरण गर्नुभएको हो ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्