१ वर्षअघिकाे दैलेख घटना : आत्महत्या दुरुत्साहन मुद्दामा डेढ वर्ष कैद सजाय

फागुन १६, २०७८ सोमबार २०:१३:९ | अमर सुनार

दैलेख – चार छोराछोरीसहित आठबीस नगरपालिका–३ निमायलकी ३५ वर्षीया सुकी बडुवालले एक वर्षअघि आत्महत्या गरेको घटनामा दैलेख जिल्ला अदालतले सुकीका श्रीमान् ३८ वर्षीय मानसिंह बडुवाललाई डेढ वर्ष कैद र १५ हजार रुपैयाँ जरिबाना गरेको छ ।

मुलुकी अपराध संहिता ऐन २०७४ को दफा १८५ को उपदफा (२) बमोजिम जिल्ला न्यायाधीश दण्डपाणी लामिछानेको इजलासबाट मानसिंह बडुवाललाई आज साेमवार सजाय सुनाइएकाे दैलेख जिल्ला अदालतका सूचना अधिकारी टिकाराम न्यौपानले जानकारी दिनुभयो ।

गएकाे फागुन २३ गते सुकी बडुवालले जेठी छोरी १५ वर्षीया कल्पना, माहिली छोरी १२ वर्षीया सरिता, कान्छी छोरी सात वर्षीया रजनी र छोरा १० वर्षीय ललितसहित कर्णाली नदीमा हाम फालेर आत्महत्या गर्नुभएकाे थियाे ।

पारिवारिक विवादका कारण फागुन २४ गते बिहान चार छाेराछाेरीसहित सुकीले कर्णालीमा हाम फालेर आत्महत्या गरेको आठबीस नगरपालिका ३ निमायलका बजीरसिंह थापा (सुकीका भाइ) ले गएकाे चैत ११ गते जिल्ला प्रहरी कार्यालय दैलेखमा दिएको जाहेरीमा उल्लेख छ । श्रीमानले आत्महत्या गर्न बाध्य बनाएको भन्दै दिइएको जाहेरीको आधारमा प्रहरीले चैत १२ गते सुकीका श्रीमान् मानसिंहलाई पक्राउ गरेको थियो ।

कर्णालीमा हाम फालेर ज्यान गुमाएका सुकीसहित पाँचै जनाको शव अछामको पञ्चदेवल विनायक नगरपालिका ४ बेलखेत र अछामकै तुर्माखाँद गाउँपालिका ३ असाराघाट नजिक कर्णाली नदी किनारमा फरक–फरक दिनमा फेला परेपछि अछामको मङ्गगलसेन अस्पतालमा फागुन २५ गते र फागुन २७ गते शव परीक्षण गरिएको थियो ।

अछामको भू–भागमा शव फेला परेका कारण मङ्गगलसेन अस्पतालमा शव परीक्षण गरिए पनि मृतकहरू दैलेखकका भएका कारण जिल्ला प्रहरी कार्यालय दैलेखमा मुद्दा चलाइएको थियो । घटनाका सम्बन्धमा प्रहरीले गरेको अनुसन्धानका आधारमा जिल्ला सरकारी वकिल कार्यालयमार्फत चैत २९ गते दैलेख जिल्ला अदालतमा आत्महत्या दुरुत्साहन मुद्दा दर्ता भएको थियो ।

मुद्दा दर्ता भएकै दिन दैलेख जिल्ला अदालतमा भएको थुनछेक बहसपछि जिल्ला न्यायाधीश दण्डपाणी लामिछानेकै इजलासबाट कसुरदारलाई पुर्पक्षका लागि दैलेख कारागारमा राखिएको थियो ।

जिल्ला सरकारी वकिल कार्यालयका कार्यालय प्रमुख जिल्ला न्यायाधिवक्ता हरि घिमिरेले कानुनमा तोकिएअनुसार पाँच वर्ष कैद र ५० हजार रुपैयाँ जरिबाना सजायको मागदाबी गर्नुभएको थियो । तर दैलेख जिल्ला अदालतका वैतनिक वकिल टेकबहादुर केसीले परिवारका सबैलाई आत्महत्या गर्न बाध्य पारेको नभइ आमा सुकीको मनोगत उत्तेजनामा पाँच जनाको ज्यान गएको भन्दै कसुरदारलाई न्यूनतम सजायको जिरह गर्नुभएको थियो ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अमर सुनार

दैलेखका उज्यालो सहकर्मी अमर सुनार मानवअधिकारको क्षेत्रमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्