काठमाण्डाै – गृहमन्त्री बालकृष्ण खाणले यात्रुलाई बोझ हुने गरी भाडा नलिन यातायात व्यवसायीलाई आग्रह गर्नुभएको छ । गृहमन्त्री खाणले एकै ठाउँमा जाँदा पनि फरक फरक भाडा दर देखाउने अवस्थाकाे तत्काल अन्त्य गर्नुपर्ने बताउनुभयो । 

नेपाल यातायात व्यवसायी राष्ट्रिय महासङ्घको छैटाैँ राष्ट्रिय महाधिवेशनलाई आज आइतवार काठमाण्डाैमा उद्घाटन गर्दै उहाँले भाडा निर्धारण गर्दा यात्रु र व्यवसायी दुवैलाई मर्का नहुने बाटो अवलम्बन गर्नुपर्ने पनि स्पष्ट पार्नुभयो ।

गृहमन्त्री खाणले भन्नुभयो, ‘यात्रुलाई पनि भाडा तिर्दा धेरै बोझ नहोस् । त्यतापट्टि ध्यान दिनुपर्छ भन्ने लाग्छ मलाई । अब यात्रको बारेमा पनि बोल्नुपर्छ जस्तो लाग्यो । यात्रुको गुनासो के छ भने– एकै ठाउँमा जाँदा पनि भाडा फरक–फरक हुन्छ । भाडा निर्धारण गर्दा यात्रु र व्यवसायी दुवैलाई मर्का नपरोस् । यातायातको क्षेत्रलाई प्रविधिसँग जोडेर अघि बढाउन आवश्यक ऐन, कानुन बनाउन सरकार सदा तयार छ ।’

गृहमन्त्री खाणले सरकारले सबै खालका उद्योगी, व्यवसायीकाे लगानीको सुरक्षा गर्ने दायित्वलाई गम्भीरतापूर्वक लिएको बताउनुभयो । 

यस्तै कार्यक्रममा बोल्दै भौतिक पूर्वाधार तथा यातायातमन्त्री रेणुकुमारी यादवले राम्राे अवस्थामा नभएकाे गाडी चलाउनका लागि रोक लगाउन सरकारले अझै कडाइ गर्ने बताउनुभयो । उहाँले गाडीको नियमित परीक्षण गर्न पनि यातायात व्यवसायीलाई सचेत गराउनुभयो ।