हिजाे एमालेलाई तराई प्रवेश गर्न दिइएकाे थिएन, अहिले मधेस बलियाे गढ बनेकाे छ : ओली

वैशाख ८, २०७९ बिहीबार १६:३:२७ | उज्यालो सहकर्मी

काठमाण्डाै – नेकपा एमालेका अध्यक्ष केपी शर्मा ओलीले पालिका चुनावमा तराईका जनताले आफ्नाे पार्टीलाई मात्रै स्वागत गर्ने बताउनुभएको छ ।

आज बिहीवार काठमाण्डाैमा नेकपा एमाले केन्द्रीय सल्लाहकार परिषद्को बैठकलाई सम्बोधन गर्दै अध्यक्ष ओलीले यस पटकको पालिका चुनावमा तराईका जनताले एमालेलाई मात्रै स्वागत गर्ने बताउनुभएको हो । उहाँले विगतमा तराईमा एमालेलाई प्रवेश निषेध गरिएको उल्लेख गर्दै अहिले तराई, मधेसमा एमालेको लहर आएको बताउनुभयो ।

मधेस प्रदेश एमालेको बलियाे गढ बनेको भन्दै अध्यक्ष ओलीले पालिका चुनावमा एमालेले बहुमत ल्याउने दाबी गर्नुभयो । उहाँले भन्नुभयो, ‘हामी बहुमत ल्याउन सक्छौँ । अघिल्लो चुनावमा पनि हामी सरकारमा थिएनौँ । तर हामीले परिणाम राम्रो ल्याएको थियौँ । तराईमा हामीलाई प्रवेश गर्न दिइएको थिएन । यसपल्ट तराईमा एमालेलाई मात्र जनताले स्वागत गर्छ । मधेशमा अहिले एमालेको लहर आएको छ ।’

अध्यक्ष ओलीले तत्कालीन नेपाल कम्युनिस्ट पार्टी (नेकपा) कब्जा गर्ने षड्यन्त्र समाप्त पार्नका लागि आफूले प्रतिनिधि सभा विघटन गर्नुपरेको बताउनुभयो । प्रचण्ड, माधव नेपालहरूले सङ्गठन कब्जामा लिइसकेकाले कार्यकर्तामा अपिल गर्न जानुको विकल्प आफूसँग नरहेको उहाँले उल्लेख गर्नुभयो । उहाँले भन्नुभयो, ‘पार्टी कब्जा गर्ने षड्यन्त्र समाप्त पार्नका लागि प्रतिनिधि सभा विघटन गरेर सङ्गठन सुुदृढ गर्नुपर्‍याे ।’

अध्यक्ष ओलीले एमालेकाे सूर्य चिह्न सिध्याउँछु भनेर खान खोज्नेहरूको मुख जलेको टिप्पणी गर्नुभयो । तत्कालीन नेकपामा प्रचण्डले आफूलाई पार्टीबाट निष्कासन गरी मुद्दा चलाएर थुन्ने योजनाका साथमा १९ पृष्ठ लामो अभियोग पत्र ल्याएको उहाँकाे दाबी छ । उहाँले भन्नुभयो, ‘एमालेको सूर्य सिध्याउँछु भनेर कुदेकाहरूको थुतुनो जलिराखेको छ । गएकाे वर्ष एउटा डरलाग्दो षड्यन्त्र भयो । पार्टी अध्यक्षकाविरुद्ध, प्रधानमन्त्रीकाविरुद्ध फौजदारी आरोपहरूसहित १९ पृष्ठ लामो अभियोगपत्र अगाडि बढाइयो । त्यस अभियोगपत्रकाे याेजना भनेकाे पार्टीबाट निष्कासन गर्ने र मुद्दा चलाएर थुन्ने थियो ।’

अध्यक्ष ओलीले आउँदाे चुनावपछि एमाले संवैधानिक रूपमा, मूल ढोकाबाटै शासन सत्ता सम्हाल्न पुग्ने दाबी गर्नुभयाे ।

अन्तिम अपडेट: पुस १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्