काठमाण्डाै - सदर चिडियाखानामा रहेका एक जोडी चिम्पाञ्जीका लागि सुविधा सम्पन्न ‘चिम्पाञ्जीको घर’ बनाइएको छ । 

आज सदर चिडियाखानाको परिसरमा नवनिर्मित ‘चिम्पाञ्जीको घर’ वन तथा वातावरण मन्त्रालयका सचिव एवम् राष्ट्रिय प्रकृति संरक्षण कोषका सदस्य प्रेमनारायण कँडेल र राष्ट्रिय प्रकृति संरक्षण कोषका सदस्य सचिव शरदचन्द्र अधिकारीले संयुक्त रुपमा उद्घाटन गर्नुभएको हो । याे घर चिम्पाञ्जीका लागि सुविधा सम्पन्न रहेको तथा चिडियाखाना आउने दर्शकहरुका लागि पनि सजिलै अवलोकन गर्न सकिने गरी निर्माण गरिएको सदर चिडियाखानाले बताएको छ ।

चिडियाखानामा रहेका एक जोडी चिम्पाञ्जीका बच्चा २०७४ साल असोज ३१ गते अवैध रुपमा नेपाल ल्याइएको अवस्थामा केन्द्रीय अनुसन्धान ब्युरो(सीआईबी) ले उद्धार गरी चिडियाखानामा ल्याएकाे थियाे । चिडियाखाना आइपुग्दा चिम्पाञ्जीको भाले बच्चा अन्दाजी ३ महिनाको र तौल ३ दशमलव ५ केजी रहेको तथा पोथी बच्चा अन्दाजी ६ महिनाको र तौल ४ केजी रहेकोमा अहिले  भालेको तौल २१ केजी र पोथीको तौल २४ केजी रहेको छ । चिम्पाञ्जीलाई मौसम अनुसारको फलफूल, सागसब्जी, दूध, पाउरोटी, मह खुवाउने गरिएको छ ।

याे पनि पढ्नुहाेस् ।

चिडियाखानाका नयाँ पाहुना चम्पा र चिम्पु

चिम्पाञ्जीको जोडीलाई प्रभुशम्शेर जबरा तथा राजी राणा ट्रष्टकी राजी राणाले वार्षिक दश लाख रुपैयाँ उपलब्ध गराएर अभिभावकत्व लिनुभएको छ । चिडियाखानाले वन्यजन्तु अभिभावकत्व अभियान सुरु गरेको र यस अभियान अन्तर्गत चिडियाखानाका वन्यजन्तुहरुको आवश्यक आहारा, स्याहार, स्वास्थ्योपचार खर्च लगायतका सम्पूर्ण अभिभावकत्व जो कोहीले लिन सक्ने सदर चिडियाखानाले जनाएकाे छ । 

१२० रोपनी क्षेत्रफलमा फैलिएको सदर चिडियाखानामा अहिले १ सय १३ प्रजातिका विभिन्न वन्यजन्तुहरु प्रदर्शनीमा रहेका छन् । सदर चिडियाखानाले वार्षिक रुपमा औसत तीन सय वन्यजन्तुको उद्धार गर्दै आएको बताइएको छ ।

तस्बिर : रासस