पीएम कप : एपीएफको शानदार प्रदर्शन, प्रदेश दुईलाई ९६ रनले हरायो

जेठ २१, २०७५ सोमबार १८:२४:२१ | उज्यालो सहकर्मी

काठमाडौं – प्रधानमन्त्री कप क्रिकेट प्रतियोगिता अन्तर्गत सोमबार भएको खेलमा विभागीय टोली एपीएफ विजयी भएको छ ।

प्रदेश २ लाई डकवर्थ लुइस नियम अनुसार ९६ रनले हराउँदै एपीएफ सेमिफाइनलमा पुगेको छ ।

कीर्तिपुरको टीयू क्रिकेट मैदानमा भएको खेलमा दुई ब्याट्सम्यानले शतक प्रहार गर्दा टस जितेर ब्याटिङ रोजेको एपीएफले ५० ओभरमा ६ विकेट गुमाउँदै ३३९ रनको विशाल योगफल तयार पारेको थियो । यो योगफल प्रतियोगिताकै सर्वाधिक ठूलो योगफल हो ।

यसअघि नेपाल पुलिस क्लबले ३२४ रनको योगफल बनाएको थियो । एपीएफको पारीलाई उकास्नका लागि सुवास खकुरेल र प्रदिप ऐरीले शतक प्रहार गरे । ओपनर सुवासले १०३ रनको योगदान दिँदा प्रदिपले विस्फोटक १५८ रनको योगदान दिए । उनले १३५ बलमा १३ चौका र ८ छक्का प्रहार गरेका थिए ।
यस्तै पृथु बास्कोटाले पनि १४ बलमा २९ रनको आक्रामक पारी खेले भने भूवन कार्कीले १६ रन जोडे ।

एपीएफको झरेको कुल ६ विकेटमध्ये ५ विकेट दिभ्यांशु मल्लिकले लिएका थिए ।

३४० रनको लक्ष्य पछ्याउने क्रममा प्रदेश २ ले १६ ओभरमा बिना विकेटको क्षतिमा ६४ रन बनाएपछि मैदानमा वर्षा भएको थियो । जसका कारण खेल २८ ओभरमा झारियो भने २०२ रनको नयाँ लक्ष्य निर्धारण गरियो ।

खेल सुरु भएलगत्तै प्रदेश २ का ब्याट्सम्यान लगातार पवेलियन फर्किए । १७औं ओभरमा नै एपीएफका करण केसीले ओपनर सुरज पेटललाई ३४ रनको व्यक्तिगत स्कोरमा क्याचआट गराए भने त्यसपछि क्रिजमा आएका हसिम अन्सारीलाई डकआउट गरे । महबुव आलम २ रन बनाएर बसन्त रेग्मीको बलमा एलबीडब्ल्यू भएपछि सौरभ नागवंशी पनि शून्यमै पवेलियन फर्किए । २० औं ओभरमा हरिशंकर शाहलाई बसन्त रेग्मीले बोल्ड गरेपछि पाचौं विकृेट गुमाएको प्रदेश २ ले थप १९ रनका लागि चार विकेट खर्चिँदा १०५ रनमात्र बनाउन सक्यो ।

बलिङतर्फ एपीएफका कप्तान बसन्त रेग्मी र करण केसीले ३–३ विकेट लिए । तीन खेलबाट ३ अंक जोडेको एपीएफ सेमिफाइनलमा पुगेको छ । समूहको विजेता र उपविजेताको टुंगो लगाउनका लागि अब एपीएफले यसअघि सेमिफाइनल पुगिसकेको त्रिभूवन आर्मी क्लबको सामना गर्नेछ ।

प्रदेश पाँच विजयी

मूलपानी मैदानमा भएको खेलमा प्रदेश ५ विजयी भएको छ । वर्षाले प्रभावित खेलमा प्रदेश ५ ले ३ लाई डकवर्थ लुइस नियम अनुसार ३० रनले हरायो । सुरुवाति ब्याटिङ गरेको प्रदेश ३ ले ४४.५ ओभरमा सबै विकेट गुमाउँदै १५२ रन बनाएको थियो ।

प्रदेश ३ का लागि भुपेन्द्र थापाले सर्वाधिक ४६ रन जोडे भने अन्यको प्रदर्शन कमजोर रह्यो । बलिङतर्फ लाल अधिकारीले ४ विकेट लिँदा कृष्ण कार्की, सन्दिप सुनार र विक्रम भुषालले २–२ विकेट हात पारे ।

१५३ रनको लक्ष्य पछ्याएको प्रदेश ५ ले २०.५ ओभरमा तीन विकेट गुमाउँदै ८९ रन बनाएको थियो । तर पानी परेपछि एक बल पनि चल्न सकेन । डकवर्थ लुइस नियम अनुसार ६० रनको नयाँ लक्ष्य निर्धारण गरियो । जुन प्रदेश ५ ले पार गरिसकेको थियो ।

यो जितसँगै प्रदेश ५ ले सेमिफाइनल पुग्ने सम्भावना बलियो बनाएको छ । तीन खेलबाट उसले ५ अंक बनाएको छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्