मेलम्ची आयोजनाको पानी सुरुङमा पठाउन बन्द, अब बर्खापछि मात्रै सुरुङको ढोका खाेलिने

जेठ १७, २०७९ मंगलबार १४:१०:५ | उज्यालो सहकर्मी

काठमाण्डाै – मेलम्ची खानेपानी आयोजनाको सुरुङमा पानी पठाउने काम बन्द गरिएको छ । आयोजनाको सुरुङ अन्तर्गत सिन्धुपाल्चोकको अम्बाथानमा रहेको मूल ढोका बन्द गरेसँगै काठमाण्डाैमा मेलम्चीबाट पानी आउन बन्द भएको मेलम्ची खानेपानी विकास समितिका सूचना अधिकारी राजेन्द्रप्रसाद पन्तले जानकारी दिनुभयो ।

पानी पर्ने क्रम बढेसँगै टनेलभित्र बालुवा गेग्रानसहित धमिलो पानी प्रवेश गर्न थालेपछि आज मङ्गलवार बिहान ८ बजेदेखि मूल ढोका बन्द गरिएको उहाँले बताउनुभयो । गएको वर्ष असार १ गते सुरुङ बन्द गरिएको थियो भने त्यही दिन मेलम्ची खोलामा बाढी आएको थियो । यस पटक पनि बाढी आउने गरी मनसुन सक्रिय हुने अवस्था आएलगत्तै आयोजनाबाट पानी ल्याउन रोक्ने समितिको तयारीअनुसार मौसम पूर्वानुमान महाशाखासँग समन्वय गरेर सुरुङ बन्द गरिएको पन्तले बताउनुभयो ।

सुरुङमा पानी पठाउन छाडेसँगै काठमाण्डौको महाङ्कालचौर पानी भण्डारण पोखरीमा पानी आउन बन्द भएको छ । बन्द गरिएको सुरुङ मार्ग अब वर्खापछि मात्रै खोलिने र त्यसका लागि सम्भवतः कात्तिकसम्म पर्खनुपर्ने आयोजनाले जनाएको छ ।

गएको वर्ष बाढीका कारण मुहानमा क्षति पुगेपछि मर्मत गरेर गएको वैशाख ११ गतेदेखि पानी सुरुङ मार्गमा पठाइएको थियो । अस्थायी संरचना तयार पारेर पानी सुरुङमा पथान्तरण गरिएको हो । अहिले मेलम्ची मुहान जलाधार क्षेत्रको भौगोलिक अध्ययन भइरहेको छ । अध्ययन प्रतिवेदनको आधारमा दिगो रूपमा मेलम्ची खानेपानी व्यवस्थापनको काम गर्ने र त्यो काम नहुञ्जेल बर्खामा बन्द गरेर हिउँदमा सुरुङमा पानी पठाउनु एक मात्र विकल्प भएको सूचना अधिकारी पन्तले बताउनुभयो ।

अन्तिम अपडेट: माघ १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्