काठमाण्डाै – पहिरोले लमजुङको बेसीसहर–चामे सडक फेरि बन्द भएकाे भएको छ । हिजो शुक्रवार दिउँसोदेखि सञ्चालनमा आएको सडकको बेसीसहर नगरपालिका ६ खरखरे भिरमा आज शनिवार बिहान पहिरो गएको हो । 

पहिराे खसेपछि यात्रु अलपत्र परेका जिल्ला प्रहरी कार्यालय लमजुङका प्रहरी निरीक्षक एवम् सूचना अधिकारी जगदीश रेग्मीले बताउनुभयो । डुम्रे–बेसीसहर–चामे सडक योजना कार्यालय लमजुङले बाटो खुलाउने प्रयास गरिरहेको जनाएको छ । बेसीसहर–चामे सडक लमजुङ र मनाङ जिल्ला जोड्ने एक मात्र सडक हो ।

यसैबीच पहिराे खसेर बन्द भएकाे भैसे–भीमफेदी सडक खण्डमा गाडी चल्न थालेका छन् । मकवानपुरको भीमफेदी गाउँपालिका ४ पान्द्राङमा गए राति वर्षासँगै आएको पहिरोका कारण सडक बन्द भएको थियो । 

आज बिहानदेखि दुईतर्फीरूपमा गाडी सञ्चालनमा आएको इलाका प्रहरी कार्यालय भीमफेदीले जनाएको छ । 

यस्तै हेटौँडा–भीमफेदी हुँदै काठमाण्डाै जोड्ने छोटो मार्ग सिस्नेरी सडक खण्ड अझै सञ्चालनमा आउन सकेको छैन । केही दिनदेखि बन्द सडक खण्डमा गाडी सञ्चालनका लागि पहिरो हटाउने काम भइरहेको भीमफेदी प्रहरीले जनाएको छ ।