इम्बाेस्ड नम्बर प्लेटमा अङ्ग्रेजी भाषा किन ? यसाे भन्छ मन्त्रालय

असार ८, २०७९ बुधबार २०:१९:५ | उज्यालो सहकर्मी

काठमाण्डाै – भौतिक पूर्वाधार तथा यातायात मन्त्रालयका सचिव गोपालप्रसाद सिग्देलले दक्षिण एसियाका चार देशबीच भएको बीबीआईएन सन्धिका कारण इम्बोस्ड नम्बर प्लेटमा अङ्ग्रेजी भाषा प्रयोग गर्नुपरेको बताउनुभएको छ ।

संसद्को राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्याङ्कन समितिको आज बुधवारको बैठकमा बोल्दै सचिव सिग्देलले भुटान, बङ्गलादेश, भारत र नेपालका बीचमा भएको बीबीआईएन सन्धिका कारण इम्बोस्ड नम्बर प्लेटमा अङ्ग्रेजी भाषा प्रयोग गर्नुपरेको बताउनुभएको हो । उहाँले दक्षिण एसियामा 'सिमलेस ट्रान्सपोर्ट' गर्ने सम्झौता भएको र त्यसो गर्दा अङ्ग्रेजी भाषाका अङ्कहरू सबै देशका संयन्त्रले पढ्न सक्ने हुनाले इम्बाेस्ड नम्बर प्लेटमा अङ्ग्रेजी भाषा राखिएको बताउनुभयो ।

उहाँले भन्नुभयो, ‘नेपालसहित दक्षिण एसियाका चार देशबीच बीबीआईएन सम्झौता भएको छ । त्यो सम्झौताले हाम्रो नेपाली प्लेटमा पनि अङ्ग्रेजी अङ्क हुँदा सबै देशमा सहजै पढ्न सक्ने र त्यहाँको संयन्त्रले पनि पढ्न सक्छन् । नेपाली भाषा रिड गर्ने सजिलै सफ्टवेयरहरू उपलब्ध नहुनेकाे कारण पनि हो ।’

उहाँले इम्बोस्ड नम्बर प्लेट बनाउन २०७३ सालमा सम्झौता गरिएको र सम्झौता गर्दा सम्बन्धित कम्पनी कालोसूचीमा नपरेको बताउनुभयो । सम्झौतापछि कालोसूचीमै परे पनि तत्काल ठेक्का सम्झौता रद्द नहुने कानुनी व्यवस्था रहेको उहाँले उल्लेख गर्नुभयो ।

यातायात व्यवस्था विभागका महानिर्देशक नमराज घिमिरेले इम्बोस्ड नम्बर प्लेट बनाउनका लागि सरकारको पैसा खर्च नहुने बताउनुभयो । उहाँले सम्झौताअनुसार २५ लाख गाडीमा प्रति गाडी दुई हजार पाँच सयदेखि तीन हजार हजार ६ सय रुपैयाँसम्ममा इम्बोस्ड नम्बर प्लेट बनाइने बताउनुभयो । त्यसबापत झन्डै सात अर्ब ३९ करोड रुपैयाँ पैसा उठे पनि कम्पनीले झन्डै चार अर्ब ६८ करोड रुपैयाँ लिने र झन्डै दुई अर्ब ४० करोड रुपैयाँ सरकारको राजस्वमा जाने उहाँले जानकारी दिनुभयो ।

महानिर्देशक घिमिरेले विश्वमा ९५ प्रतिशत देशमा इम्बोस्ड नम्बर प्लेट जडान भइसकेको बताउनुभयो । उहाँले दक्षिण एसियामा नेपालमा मात्रै इम्बोस्ड नम्बर प्लेट जडान नभएको उल्लेख गर्दै इम्बोस्ड नम्बर प्लेट जडान गर्नु आवश्यक रहेको बताउनुभयो ।

अन्तिम अपडेट: माघ १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्