हावाहुरीका कारण बोगटानमा एक दर्जनभन्दा बढी घरमा क्षति, एक जना बालक घाइते

 असार ३२, २०७९ शनिबार १३:८:५९ | विमल बिष्ट
unn.prixa.net

डोटी - डोटीको बोगटान फुड्सिल गाउँपालिकामा आएको हावाहुरीले एक दर्जनभन्दा बढी घर तथा सार्वजनिक संरचनामा क्षति पुर्याएकाे छ। 

हिजाे बेलुका आएको हावाहुरीले धेरै घरमा क्षति पुगेको बोगटान फुड्सिल गाउँपालिका–७ का वडाअध्यक्ष चन्द्रमान सुनारले जानकारी दिनुभयो। 

हावाहुरीले घरको सिलेट खस्दा बोगटान फुड्सिल गाउँपालिका–७ चवराचौतारा दाच्का बस्ने हिमाल कुडमालका तीन वर्षीय छोरा विजय कुडमाल गम्भीर घाइते भएका छन् । घरको आगनमा खेलिरहेका उनको टाउकोमा सिलेट खसेकाे थियाे। 

घाइते विजयको चवरा चौतारा स्वास्थ्य चौकीमा उपचार भइरहेको छ । टाउँकोमा दुई ओटा घाउ लागेकाले एउटामा ३ र एउटामा एक गरेर ४ वटा टाका लगाइएको स्वास्थ्य चौकी प्रमुख प्रकाश विकले जानकारी दिनुभयो।

हावाहुरीकै कारण सबैभन्दा बढी चवराचौतारामा रहेका थुप्रै निजी तथा सार्वजनिक संरचनामा क्षति पुगेको बताइएको छ। यसैगरी रुख विद्युतका तारमा खस्दा र पोल ढलेका कारण वडा-७ मा विद्युत् अवरुद्ध भएकाे प्रहरी चौकी चमराचौताराले जनाएको छ । यसैगरी वडा नं ७ उमुडीका ४ घर चर्केर जोखिममा रहेका छन् । 

हावाहुरीले दर्जनौँ घरका छाना उडाएको र चवराचौतारा बजार क्षेत्रमा जडान गरिएका सौर्यबत्तीमा समेत क्षति पुर्याएको स्थानीयवासी उपेन्द्र धामीले बताउनुभयो । हावाहुरीकै कारण पीपलको रुख भाँचिदा चनुकाँडा आधारभूत विद्यालयको संरचनामा क्षति पुगेको छ ।

भान्सा कोठा, चार वटा शाैचालय र ३ कोठे विद्यालय भवनमा क्षति पुगेको स्थानीयवासी रबहादुर बमले जानकारी दिनुभयो।

अन्तिम अपडेट: असार २५, २०८१

उज्यालोका खबर फेसबुक, इन्स्टाग्राम, एक्स ट्वीटरयूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ । 

तपाईको प्रतिक्रिया