खेरसन क्षेत्र जोड्ने पुलमा युक्रेनको रकेट आक्रमण, रुसी सेनालाई बन्दोबस्तीमा समस्या पर्ने दाबी

 साउन १२, २०७९ बिहिबार १३:५६:१३ | एजेन्सी
unn.prixa.net

युक्रेनले रुसी कब्जामा रहेको खेरसन क्षेत्रलाई आफ्नो नियन्त्रणमा ल्याउने अभियान सुरु भएको जनाएको छ । रुसले युक्रेनमा आक्रमण थालेर नियन्त्रणमा लिएको पहिलो क्षेत्र खेरसनलाई पुनः आफ्नो नियन्त्रणमा लिन युक्रेनले पुलमा आक्रमण गरेको बीबीसीले जनाएको छ । 

डिनिप्रो नदीको पश्चिम क्षेत्रमा रहेको रणनीतिक सहर खेरसनमा पुग्ने पुललाई नै युक्रेनी सेनाले अमेरिकाले दिएको हिमर्स रकेट प्रहार गरेर ध्वस्त बनाएको छ । खेरसन सहर जोड्ने पुलमा नै क्षति पुगेपछि खेरसनमा रहेका हजारौँ रुसी सेनालाई बन्दोबस्तीका सामानको समस्या पर्नेछ र रुसले कब्जामा लिएका अरू क्षेत्रसँगको सम्बन्धविच्छेद भएको छ । पुलमा क्षति पुगेसँगै रुसी सेनालाई गाह्रो पर्ने र युक्रेन बलियो अवस्थामा पुग्ने खबरमा उल्लेख छ । 

गए राति एक भिडिओ सन्देश जारी गर्दै युक्रेनी राष्ट्रपति भ्लोदोमिर जेलेन्स्कीले पुलमाथिको आक्रमणकाे प्रशंसा गर्दै रुसले कब्जा गरेका क्षेत्रलाई स्वतन्त्रता प्रदान गर्ने अभियान सुरु भएको बताउनुभएको छ । रुसले भने खेरसन जोड्ने पुल ध्वस्त हुँदा यसले आफ्ना सेनालाई नभइ त्यहाँका स्थानीयवासीलाई असर पर्ने प्रतिक्रिया दिएको छ ।

अन्तिम अपडेट: भदौ १२, २०७९

तपाईको प्रतिक्रिया