नारायणगढ–बुटवल सडक विस्तार : म्याद थपिएपछिको काम दशैँ लगतै

भदौ २५, २०७९ शनिबार ११:३१:२ | दयाराम आचार्य

नवलपुर – चार लेनमा विस्तारको क्रममा रहेको नारायणगढ–बुटवल सडककाे काम आउँदाे दशैँ लगत्तै फेरि सुरु हुने भएको छ । आयोजनाको पहिलो ठेक्का सम्झौता अवधि सकिएपछि पुनः एक वर्ष म्याद थप गरिएको छ । तर म्याद थप भए पनि असोजपछि मात्रै निर्माण कम्पनीले काम गर्ने मनशाय बनाएको नारायणगढ–बुटवल सडक विस्तार आयोजना प्रमुख रमेशकुमार दिष्टीले बताउनुभयो ।

निर्माणको जिम्मा पाएको चाइना स्टेट कन्स्ट्रक्सन इन्जिनियरिङ कर्पोरेशनले अहिले आयोजनामा कामदार परिचालन गरेको छैन । आयोजना प्रमुख दिष्टीले भन्नुभयो, ‘अहिले सामान्य राजमार्गमा भएका खाल्डाखुल्डी पुर्ने काम गरेको छ, विस्तार आयोजनाको काम भने दशैँपछि पुनः सुरु गर्ने निर्माण कम्पनीको मनशाय देखिन्छ।’ यो बीचमा म्याद थपको प्रक्रियामा रहेको र अझै बर्खा पनि नसकिएकाले अब दशैँपछि काम सुरु हुने उहाँको भनाइ छ ।

४२ महिनाभित्र काम सम्पन्न गर्ने गरी विसं २०७५ माघ २४ गते सम्झौता भएर नारायणगढ–बुटवल सडक विस्तारको काम थालिएको थियो । तर यस अवधिमा झन्डै १८ प्रतिशतमात्रै काम भएपछि पुनः एक वर्षका लागि म्याद गरिएको हो । म्याद थप भएपछि कामले तीव्रता लिने आयोजना प्रमुख दिष्टीले बताउनुभयो । ‘यसअघि रुख काट्नुपर्ने प्रक्रिया, बिजुलीका पोल सार्ने विषयलगायतका कारण अलमल थियो, अब हाम्रो तर्फबाट सुल्झाउनुपर्ने विषय सबै सकिएको छ’, उहाँले भन्नुभयो, ‘यस कारण अब निर्माण कम्पनीले तीव्ररूपमा काम गर्छ भन्ने विश्वास छ ।’

सडक विस्तारकाे काममा ढिलाइ भएपछि अहिले चाइना स्टेटको मुख्य कार्यालयबाट अध्ययनका लागि टोली आएको आयाेजना प्रमुख दिष्टीले बताउनुभयो । उहाँले भन्नुभयो, ‘मुख्य कार्यालयबाट टोली अध्ययनका लागि आएको छ, काममा ढिलाइ हुनुमा के कारण रहेछ भन्ने विश्लेषण गर्ने र कामलाई कसरी तीव्र गतिमा लैजाने भन्ने उनीहरूको लक्ष्य रहेको छ ।’

आयोजना प्रमुख दिष्टीका अनुसार पूर्वी खण्डमा पुल निर्माणको कामसमेत यसै वर्ष सकिने छ । पूर्वी खण्डमा १२ वटा ठूलो पुल निर्माण गर्नुपर्नेमा १० वटामा काम भइरहेको छ । १० वटा पुलको विभिन्न चरणमा काम चलिरहेको छ । बाँकी दुई वटा पुलको कामसमेत सुरु गरी यसै वर्ष सबै पुल निर्माण सम्पन्न हुने उहाँले बताउनुभयो । साविकका ठूलो पुल रहेको ठाउँमा एउटा नयाँ पुल थपिनेछन् । साविकका पुल यथावत् सञ्चालनमा रहनेछन् ।

साना पुलहरू २२ वटा निर्माण गर्नुपर्नेमा १५ वटाको काम सकिएर गाडीसमेत चल्न थालेकाे आयोजना प्रमुख दिष्टीले बताउनुभयो । साना पुलहरूमध्ये कुनै ठाउँमा एउटा र कुनै ठाउँमा दुइटै सञ्चालनमा रहेको उहाँले बताउनुभयो ।

चाइना स्टेट कन्स्ट्रक्सन इन्जिनियरिङ कर्पोरेसनले पूर्व –पश्चिम राजमार्ग अन्तर्गत नारायणगढ–बुटवल खण्डको एक सय १४ किलोमिटर सडक निर्माणको काम गरिरहेको छ । दुई लेनमा रहेको यस सडक खण्ड बजार क्षेत्रमा सर्भिस लेनसहित ६, दाउन्ने खण्डमा तीन र अन्य क्षेत्रमा चार लेनको हुनेछ ।

गैँडाकोटदेखि दाउन्नेसम्म पहिलो खण्ड ६५ किलोमिटर र दाउन्नेदेखि बुटवलसम्म ४९ किलोमिटर गरी दुई खण्डमा विभाजन गरेर निर्माणको काम चलिरहेको छ । झन्डै १७ अर्ब रुपैयाँ लागत लाग्ने यो योजना लामो समयसम्म पनि निर्माण सम्पन्न नहुँदा यस खण्डमा यात्रा गर्ने यात्रु र चालकले सास्ती खेप्दै आएका छन् । खाल्डाखुल्डीले राजमार्ग जीर्ण बनेको छ । घाम लाग्दा धुलो र पानी पर्दा हिलोले यस खण्डको यात्रा सकसपूर्ण हुने गरेको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

दयाराम आचार्य

नवलपरासी सुस्ता पूर्वका उज्यालो सहकर्मी दयाराम आचार्य स्थानीय एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

नारायणगढ–बुटवल सडक विस्तार : म्याद थपिएपछिको काम दशैँ लगतै

फाइल तस्बिर

तपाईको प्रतिक्रिया