काठमाण्डाै – राष्ट्रपति विद्यादेवी भण्डारीले नेपाली सांस्कृतिक वैभवलाई विश्वसामु चिनाउन आवश्यक रहेको बताउनुभएको छ । 

सोमवार काठमाण्डाैमा राष्ट्रिय कविता महोत्सव २०७९ का विजेता कविहरूलाई पुरस्कार वितरण गर्दै उहाँले यस्तो बताउनुभएको हो । राष्ट्रपति भण्डारीले परापूर्वकालदेखिका ज्ञानग्रन्थ र विज्ञानको महत्त्वलाई उजागर गर्न आवश्यक रहेको बताउनुभयो । नेपाली समाजका युगौँदेखि रहँदै आएका लोकसाहित्य एवम् साहित्यिक कृतिहरूलाई सङ्कलन गरी बाहिर ल्याउनुपर्ने आवश्यकता रहेको उहाँकाे भनाइ छ । 

उहाँले भन्नुभयो, ‘नेपाली ज्ञानभूमि हो । यस भूमिमा लुकेर बसेको सांस्कृतिक वैभवलाई बाहिर निकालेर विश्वसामु चिनाउन अझै धेरै काम गर्न बाँकी छ । नेपाली समाजका युगौँदेखि रहँदै आएका लोकसाहित्य एवम् साहित्यिक कृतिहरूलाई सङ्कलन गरी बाहिर ल्याउनुपर्ने छ । नेपाली सिर्जनाहरू पनि विश्व साहित्यको उत्कृष्ट कोटीमा पर्नसक्छन् भन्ने कुरालाई अनुवादमार्फत विश्वसामु पुर्‍याएर प्रमाणित गर्नुपर्छ ।’

राष्ट्रपति भण्डारीले कविता महोत्सवले अन्तरपुस्ताको सम्बन्धलाई स्थापना गर्ने र नयाँ पुस्तालाई सिर्जना कर्ममा समर्पित गर्न सहयोग पुग्ने विश्वास व्यक्त गर्नुभयो ।