श्रीलङ्का सरकारले थप १० लाख विद्यार्थीका लागि दिवा खाजाको व्यवस्था गर्ने निर्णय गरेको छ ।

राष्ट्रपति रनिल विक्रमासिङ्घेले प्रस्तुत गरेको प्रस्तावलाई मन्त्रीपरिषद् बैठकले स्वीकृति दिएको मन्त्रीपरिषद्का प्रवक्ता बन्दुला गुणवर्दनाले जानकारी दिनुभएको छ । उहाँले यो निर्णय तत्काल कार्यान्वयन गरिने पनि बताउनुभएको छ ।

श्रीलङ्कामा विद्यालय जाने बालबच्चाको पोषण र स्वास्थ्यबारे चिन्ता व्यक्त हुँदै आएको र सरकारको यो निर्णयले यो चिन्तालाई सम्बोधन गर्नेछ । आर्थिक सङ्कटका कारण धेरै बालबालिका बिहानको खाजा नखाइ विद्यालय आउने गरेको समाचारहरु आएका थिए ।

श्रीलङ्का सरकारले यसअघि नै १० लाख ८० हजार विद्यार्थीलाई दिवा खाजा उपलब्ध गराइरहेको र यसबाट सरकारको वार्षिक एक करोड २० लाख अमेरिकी डलर खर्च हुने गरेको जनाएको छ । थप १० लाख विद्यार्थीलाई खाना खुवाउँदा सरकारले बेहोर्ने खर्च दोब्बर हुनेछ ।