काठमाण्डाै – रुपन्देही निर्वाचन क्षेत्र नम्बर २ मा आफूले दिएको उम्मेदवारी खारेज भएपछि सत्ता गठबन्धनका साझा उम्मेदवार राजु गुरुङले सर्वोच्च अदालतमा रिट दिनुभएको छ ।

निर्वाचन अधिकृतको कार्यालयले उचित प्रमाणविना आफ्नो उम्मेदवारी खारेज गरिदिएको र उम्मेदवारी कायमै राख्न माग गरेर गुरुङले आज बिहीवार सर्वोच्चमा रिट दर्ता गराउनुभएको हो ।

निर्वाचन अधिकृतको कार्यालयले एकीकृत समाजवादीका नेता गुरुङ बैंकिङ कसुरको कालोसूचीमा रहेको भन्दै मनोनयन खारेज गरिदिएको थियो । तर आफ्नो कसुर मनोनयन नै खारेज हुने प्रकृतिको नरहेको र निर्वाचन अधिकृतले एमालेका उम्मेदवार विष्णु पौडेलसँग मिलेमतो गरेको गुरुङको आरोप छ ।

रुपन्देही–२ मा एमालेबाट उपाध्यक्ष विष्णु पौडेल उम्मेदवार हुनुहुन्छ । गठबन्धनका उम्मेदवार गुरुङको मनोनयन नै खारेज भएपछि पाैडेललाई चुनाव जित्न सजिलो हुने आँकलन छ ।