पाल्पा – पाल्पामा देउसीभैलोबाट उठेको रमकले आँखा नदेख्ने विद्यार्थीलाई एक छाक खाना खुवाइएको छ ।

विशाल बजार तानसेन पाल्पाको देउसीभैलो समूहले दमकडा नमुना विद्यालयका आँखा नदेख्ने २४ जना विद्यार्थीलाई एक छाक खाना खुवाएको समूहका संयोजक बृहस्पति राना मगरले जानकारी दिनुभयो ।

देउसीभैलोबाट उठेको एक लाख बढी रकमबाट छुट्याएको १६ हजार रुपैयाँ दृष्टिविहीन विद्यार्थीलाई खाना खुवाउँदा खर्च भएको जानकारी दिँदै संयोजक रानाले अन्य पैसासमेत यस्तै सामाजिक हितमा खर्च गरिने बताउनुभयो । 

कार्यक्रममा सहभागी विशाल बजारका समाजसेवी डिलबहादुर रानाले विद्यार्थीका लागि ६ हजार, विद्यालयको अक्षयकोषका लागि कालिका फेसहाउस तानसेनका सञ्चालक धनबहादुर बुढाथोकीले १० हजार र विशाल बजारकै धर्म गाहाले ६ हजार रुपैयाँ नगद विद्यालयका प्राचार्य मोहन सापकोटालाई हस्तान्तरण गर्नुभयो ।