गठबन्धनकाे अपिल : ‘अत्यधिक बहुमतले विजयी गराउनुस्’

मंसिर १, २०७९ बिहीबार १६:१५:५५ | उज्यालो सहकर्मी

काठमाण्डौ – संविधानको भावनाअनुसार लोकतान्त्रिक गणतन्त्रको संस्थागत विकासका लागि देशव्यापीरूपमा सत्ता गठबन्धनमा आबद्ध उम्मेदवारलाई विजयी गराउन गठबन्धन आबद्ध प्रमुख चार पार्टीका अध्यक्षले आग्रह गरेका छन् ।

गठबन्धनका तर्फबाट आज बिहीवार एक संयुक्त विज्ञप्ति जारी गर्दै उनीहरूले आम चुनावलाई राष्ट्रिय महोत्सवका रूपमा लिएर मतदानमा सहभागी भइ लोकतान्त्रिक वाम गठबन्धनका उम्मेदवारलाई विजयी गराउन अनुरोध गरेका हुन् । प्रधानमन्त्री एवम् नेपाली कांग्रेसका सभापति शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल प्रचण्ड, नेकपा (एकीकृत समाजवादी) का अध्यक्ष माधवकुमार नेपाल र राष्ट्रिय जनमोर्चाका अध्यक्ष चित्रबहादुर केसीले आज संयुक्तरूपमा जारी गरेका विज्ञप्तिमा गठबन्धनका उम्मेदवारलाई मतदान गर्न आग्रह गरिएको छ ।

यही मङ्सिर ४ गते हुने प्रतिनिधि सभा र प्रदेश सभाको चुनावको प्रचारप्रसारको क्रममा नै गठबन्धनको पक्षमा देशव्यापीरूपमा जनलहर आएको र नेता कार्यकर्तामा उत्साह पैदा भएको संयुक्त अपिलमा उल्लेख छ ।

अपिलमा भनिएको छ, ‘देशको संविधान, कानुन, विधि र प्रक्रिया उल्लङ्घन गरी दुई–दुई पटक गरेको प्रतिनिधि सभाको विघटन र कोरोना महामारीमा परेका नागरिकलाई खोप दिलाउनुका सट्टामा भ्रष्टाचारमा निर्लिप्त हुँदै अनेकन स्वेच्छाचारी र प्रतिगामी कदम चालेपछि तत्कालीन सरकारविरुद्ध २०७८ असारमा यो गठबन्धन बनाउनु परेको विदितै छ ।’

डेढ वर्षको अवधिमा सरकारले स्वतन्त्र, निष्पक्ष र धाँधलीरहित रूपमा पालिका चुनाव सम्पन्न गरेको र त्यसमासमेत सहकार्य रहेको उल्लेख गर्दै अपिलमा यस चुनावमा समेत गठबन्धन एक ठाउँमा उभिएको बताइएको छ । संविधानमााथि कुनै खालको आक्रमण हुन नदिने तथा विकासका पूर्वाधारलाई छिटोभन्दा छिटो सम्पन्न गरी देशलाई विकासशील देशको दर्जामा माथि उठाउने लक्ष्यका साथ सङ्कल्प, प्रतिबद्धता र घोषणापत्र सार्वजनिक भइसकेको अपिलमा उल्लेख छ ।

गठबन्धन प्रत्यक्ष निर्वाचनतर्फ भएकाले समानुपातिकतर्फ सबै पार्टीले आ–आफ्नो पक्षमा मत माग्नु स्वाभाविक नै भएको अपिलमा उल्लेख छ । गठबन्धनको स्पष्ट बहुमतबाट नै भोलिको सरकार गठन हुने र यसले संविधानको भावनाअनुसार राजनीतिक स्थायित्व दिने दाबी पनि गरिएको छ ।

अन्तिम अपडेट: पुस १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्