रुपन्देही – नेकपा एमालेका सचिव गोकर्ण विष्टले आफूहरू सरकार निर्माणका लागि अवाञ्छित गतिविधिमा नलाग्ने बताउनुभएको छ । 

आज आइतवार बुटवलमा पत्रकारसँग कुरा गर्दै सचिव विष्टले एमालेले प्रतिपक्षमा बस्ने जनमत पाएको बताउनुभएको हो । उहाँले आफूहरू जनमतको विपरीत सरकार निर्माणका लागि अवाञ्छित र गैरसंसदीय गतिविधि नगर्ने बताउनुभयो । एमालेलाई सरकार गठनका लागि बाध्यता आइपरेमा भने पछाडि नहट्ने उहाँकाे भनाइ थियाे । 

सचिव विष्टले विगतमा सरकार बनाउने नाममा गैरसंसदीय गतिविधि हुने गरेको भन्दै एमालेले जनचाहना विरुद्धका काम नगर्ने बताउनुभयो । सरकार बनाउनका लागि एमालेललाई हतारो नभएको उहाँले उल्लेख गर्नुभयाे । 

उहाँले भन्नुभयो – ‘हामी प्रतिपक्षमा बस्नका लागि जनताले स्थान प्रदान गर्नुभएको छ । हामी सरकार निर्माणका लागि अवाञ्छित गतिविधि गर्ने गैरसंसदीय, गैरलोकतान्त्रिक, अशोभनीय काम गर्दैनाैँ । चाहे एमाले सरकारमा रहँदा होस्, चाहे प्रतिपक्षमा रहँदा होस् लोकतन्त्र, संसदीय अभ्यास, जनताका अपेक्षालाई सम्मान गर्ने गरि लोकतन्त्रको मर्यादा र गरिमालाई माथि उठाउने गरि भूमिका निर्वाह गर्छ । हामीले घोषणामार्फत जनताको जीवनलाई परिवर्तन गर्नेदेखि देशलाई सबल बनाउने प्रतिबद्धता व्यक्त गरेका छौँ । यदि आवश्यकता महसुस भयो भने, जिम्मेवारी लिने बाध्यता भयो भने एमाले जुनसुकै प्रकारको जिम्मेवारीसहित अगाडि बढ्न पनि पछि पर्दैन । तर सरकार बनाउने नाममा अवाञ्छित गतिविधि, गैरसंसदीय गतिविधि गर्दैन । त्यो प्रकारको बाटोमा एमाले हिँड्दैन । यस कारण सरकार निर्माणका लागि हामीलाई हतारो छैन । हामीलाई त्यो गर्नु छैन ।’

सचिव विष्टले एमालेलाई कमजोर बनाउनका लागि गएकाे चुनावमा वामपन्थीहरूले दक्षिणपन्थी शक्तिसँग गठबन्धन गरेकाे दाबी गर्नुभयाे । उहाँले नेकपा (माओवादी केन्द्र), नेकपा (एकीकृत समाजवादी) र राष्ट्रिय जनमोर्चामा वैचारिक विचलन देखिएको पनि जिकिर गर्नुभयाे ।